The news is by your side.

Advertisement

سعودی عرب: خاتون کو بلیک میل اور ان کا اکاؤنٹ ہیک کرنے والے کو سزا

ریاض: سعودی عرب میں ایک خاتون کو بلیک میل کرنے اور اس کے سوشل میڈیا اکاؤنٹس کو ہیک کرنے پر ایک غیر ملکی کو قید کی سزا سنا دی گئی۔

سعودی ویب سائٹ کے مطابق مکہ مکرمہ میں فوجداری عدالت نے عرب ملک سے تعلق رکھنے والے ایک غیر ملکی کو بلیک میلنگ پر ڈیرھ برس قید کی سزا کا حکم سنا دیا۔

مقامی روزنامے کی رپورٹ کے مطابق ایک خاتون نے عدالت میں نامعلوم شخص کے خلاف شکایت دائر کی جس میں کہا گیا تھا کہ ایک نامعلوم شخص نے سوشل میڈیا پراس کا اکاؤنٹ ہیک کیا اور میری شہرت کو نقصان پہنچایا۔

عدالت نے فوری طور پر سائبر کرائم کے ادارے کو تحقیقات کا حکم دیتے ہوئے کہا کہ ملزم کو تلاش کر کے عدالت میں پیش کیا جائے۔ سائبر کرائم کے ادارے نے انتہائی مختصر وقت میں ملزم کی شناخت معلوم کر کے اسے حراست میں لے لیا۔

ملزم کے قبضے سے متعدد اسمارٹ فونز بھی برآمد ہوئے جس میں مدعیہ کا ہیک کیے گئے اکاؤنٹ کا ڈیٹا بھی موجود تھا جس میں ہیک کرنے کے بعد اکاؤنٹ کو استعمال کرنے کی تمام تفصیلات بھی موجود تھیں۔

تحقیقاتی ادارے کی جانب سے تیار کی جانے والی رپورٹ میں مزید کہا گیا کہ ملزم کے قبضے سے برآمد ہونے والے اسمارٹ فونز میں مختلف ناموں سے سوشل میڈیا کے دیگر اکاؤنٹس بھی موجود تھے جن کے ذریعے یومیہ بنیاد پر چیٹنگ اور تصاویر کا تبادلہ کیا جاتا تھا۔

عدالت میں سماعت کے دوران ملزم نے بتایا کہ اس نے مدعیہ سے سوشل میڈیا پر دوستی کی جو ایک ماہ تک جاری رہی، اس دوران تصاویر کا بھی تبادلہ ہوا تاہم ملزم نے عدالت میں اس بات سے انکار کیا کہ اس نے خاتون کے اکاؤنٹ کو ہیک کیا اور نہ ہی تصاویر سوشل میڈیا پر وائرل کیں۔

عدالت نے دیگر ثبوتوں اور شواہد کی روشنی میں فیصلہ سناتے ہوئے مدعیہ کے دعوے کو درست قرار دے کر مجرم کو ڈیڑھ برس قید کی سزا کا حکم سنا دیا۔

Comments

یہ بھی پڑھیں