نئی دہلی : بھارت کے ساحلی علاقوں سے ٹکرانے والا سمندری طوفان فانی کا رخ بنگلا دیش کی جانب ہوگیا، سمندری طوفان فانی کے نتیجے میں بھارت میں 19 افراد لقمہ اجل بن گئے۔
تفصیلات کے مطابق بھارت میں سمندری طوفان فانی کی تباہ کاریاں جاری ہیں، بھارتی ریاست اڑیسہ میں طوفان سے ہلاکتوں کی تعداد 19 ہوگئی جبکہ املاک کو شدید نقصان پہنچاہے، سڑکوں پر گرے درخت اٹھانے کا کام جاری ہے۔
بھارتی خبر رساں ادارے کا کہنا تھا کہ بھارت میں طوفان فانی مغربی بنگال میں ہفتہ کی صبح داخل ہوگیا ، ہواوں کی رفتار 90 کلومیٹر فی گھنٹہ رکارڈ کی گئیں۔
غیر ملکی خبر رساں ادارے کا کہنا تھا کہ طوفان فانی کے زیر اثر کولکتہ، دیگر علاقوں میں شدید بارشیں ہورہی ہیں، درخت جڑ سے اکھڑ گئے جبکہ متعدد پروازیں معطل ہوگئیں۔
بھارتی محکمہ موسمیات کا کہنا تھا کہ طوفان فانی کمزور پڑ چکا ہے اور اب اس کا رخ بنگلہ دیش کی جانب ہے۔
خیال رہے کہ بھارت میں خطرناک سمندری طوفان فانی گزشتہ روز بھارت کے مشرقی علاقوں سے ٹکرایا تھا، جس کے باعث لاکھوں افراد کے متاثر ہوئے ہیں، مشرقی ریاست اڑیسا سے تقریباً دس لاکھ افراد نقل مکانی کرنے پر مجبور ہوئے ہیں۔
مقامی میڈیا کے مطابق بھارتی حکام نے خطرے کے پیش نظر اڑیسا، آندھرا پردیش اور مغربی بنگال میں اسکول، کالج و یونیورسٹیز بند کردی گئی ہیں جبکہ ٹرینیں بھی منسوخ کردی گئیں ہیں۔
سمندری طوفان فانی بھارت کے مشرقی ساحلی علاقوں سے ٹکرا گیا
غیر ملکی خبر رساں ادارے کا کہناتھا کہ بھارتی حکام نے اڑیسا کا بھونیشور ایئرپورٹ اور مغربی بنگال میں کولکتہ ایئر پورٹ بند کردیا گیا ہے۔
ریاستی حکام نے بندرگاہیں بھی بند کر دی گئیں، ماہی گیروں کو سمندر سے نکال لیا گیا جبکہ نشیبی علاقوں کو خالی کر لیا گیا ہے۔
