The news is by your side.

Advertisement

ڈیری فارمرز کی دودھ کی قیمت میں اضافے کے لیے درخواست دائر

کراچی: سپریم کورٹ کی جانب سے دودھ کی مقدار بڑھانے کے لیے لگائے جانے والے انجکشنوں پر پابندی کے بعد دودھ کی قیمتوں سے متعلق ڈیری فارمرز نے عدالت سے رجوع کرلیا۔

تفصیلات کے مطابق دودھ کی قیمتوں سے متعلق ڈیری فارمرز نے سندھ ہائیکورٹ سے رجوع کرلیا۔

ڈیری فارمرز کی جانب سے دائر درخواست میں کہا گیا ہے کہ کراچی میں یومیہ دودھ کی مقداراور کھپت 45 لاکھ لیٹر ہے۔ دودھ کی مقدار بڑھانے سے متعلق انجکشن پر پابندی عائد ہونے کے بعد کراچی میں دودھ کی مقدار کم ہو کر 25 لاکھ لیٹر رہ گئی ہے۔

ڈیری فارمرز کا مؤقف ہے کہ دودھ کی مقدار بڑھانے کے لیے پانی ملانا پڑ سکتا ہے۔ کراچی میں سنہ 2015 میں دودھ کی قیمت 85 روپے فی لیٹر مقرر کی گئی تھی تاہم دودھ کی کم مقدار کی وجہ سے موجودہ نرخ میں نقصان ہو رہا ہے۔

درخواست میں کہا گیا ہے کہ کراچی میں دودھ کی قیمت 85 سے بڑھا کر 96 روپے کی جائے۔

درخواست پر سندھ ہائیکورٹ نے سندھ حکومت، کمشنر کراچی اور دیگر فریقین سے 6 فروری کو جواب طلب کرلیا۔

خیال رہے کہ چند روز قبل سپریم کورٹ نے بھینسوں کو زائد دودھ کے حصول کے لیے لگائے جانے والے آر وی ایس ٹی نامی ٹیکوں کی فروخت پر پابندی عائد کرتے ہوئے کمپنیوں کا تمام اسٹاک فوری قبضے میں لینے کا حکم دیا تھا۔

عدالت نے قرار دیا تھا کہ بھینسوں کو لگنے والے ٹیکوں سے ملنے والا دودھ کینسر کا باعث ہے۔ یہ ہمارے بچوں کی زندگیوں کا معاملہ ہے۔ عدالت کوئی رعایت نہیں دے گی۔

عدالت نے یہ حکم بھی دیا تھا کہ ٹی وائٹنر کو دودھ بتا کر فروخت نہیں کیا جائے گا۔ ڈبوں پر واضح الفاظ میں ’یہ دودھ نہیں ہے‘ تحریر کیا جائے گا۔


اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

Print Friendly, PDF & Email

Comments

comments

یہ بھی پڑھیں