اسلام آباد: خیبر پختون خوا میں انتخابات کی تاریخ کے سلسلے میں الیکشن کمیشن کی ٹیم اور گورنر غلام علی میں مشاورتی اجلاس بے نتیجہ ثابت ہو گیا۔
ذرائع کے مطابق کے پی انتخابات کی تاریخ کے لیے منعقد ہونے والا اہم اجلاس نتیجہ خیز ثابت نہ ہو سکا، اجلاس میں گورنر کے پی کی جانب سے صوبے میں انتخابات کے لیے تاریخ نہیں دی گئی۔
ذرائع کا کہنا ہے کہ گورنر غلام علی کا مؤقف تھا کہ ’’صوبے میں امن کے مسائل کے باعث فوری انتخابات نہیں کرا سکتے۔‘‘
ذرائع نے بتایا کہ الیکشن کمیشن کی ٹیم کے سامنے کئی سوالات رکھے گئے اور صوبے میں امن عامہ اور سیکیورٹی کے مسائل پر بات کی گئی، الیکشن کمیشن کی ٹیم کو بتایا گیا کہ صوبے میں امن عامہ کے مسائل کے باعث فی الحال فوری انتخابات ممکن نہیں ہیں۔
الیکشن کمیشن کے ایک اعلیٰ افسر نے اے آر وائی نیوز کو بتایا کہ مشاورتی ٹیم نے بات چیت کے بارے میں کمیشن کو فوری آگاہ کر دیا ہے، اور الیکشن کمیشن جلد اس پر اپنا مؤقف پیش کرے گا۔
واضح رہے کہ صوبے میں عام انتخابات کے حوالے سے الیکشن کمیشن کی جانب بنائی گئی 3 رکنی ٹیم گورنر ہاؤس خیبر پختون خوا گئی تھی، ٹیم میں سیکریٹری، اسپیشل سیکریٹری اور ڈی جی لا شامل تھے، جنھوں نے گورنر سے صوبائی انتخابات کی تاریخ پر مشاورت کی۔
