میسوری : امریکی ریاست میسوری میں ایک عجیب و غریب واقعہ پیش آیا ہے، جس میں ایک چھ سالہ بچی کی آنکھ میں کیڑا نو گھنٹے تک رینگتا رہا۔
تفصیلات کے مطابق امریکی ریاست میسوری کی رہائشی ایک خاتون نے سوشل میڈیا پر اپنی6سالہ بیٹی کی تصاویر شیئر کی ہیں جس میں بچی کی آنکھ میں یہ کیڑا واضح طور پر نظر آرہا ہے۔
انہوں نے بتایا کہ گزشتہ رات ڈیڑھ بجے چھ سالہ سبی کائیا اچانک سو کر اٹھی اور آنکھ میں جلن کی شکایت کی، ابتدائی طور پر بچی کی آنکھ سرخ تھی اور کوئی چیز واضح نظر نہیں آئی۔
خاتون نے پہلے تو اسے عام سا انفیکشن سمجھا، تاہم بعد ازاں بچی کے آنسو رکنے کا نام نہیں لے رہے تھے اور مسلسل اذیت میں تھی، رات تین بجے درد کے بڑھ جانے پر خاتون نے اپنے شوہر کو جگایا اور بچی کو قریبی اسپتال لے گئے، جب تک بچی کی آنکھ بری طرح سوج گئی تھی اور اس میں پیپ بھرنا شروع ہوگئی۔
اسپتال کے ویٹنگ روم میں خاتون نے دیکھا کہ بچی کی آنکھ کے پپوٹے میں کچھ کالا سا مواد موجود ہے جو حرکت بھی کررہا ہے، جسے دیکھ کر اسپتال کی نرس اور ڈاکٹر بھی دم بخود رہ گئے اور سب کے چہروں پر ایک خوف کا عالم تھا۔
اسی دوران بچی نے آنکھ کھولی تو وہی کیڑا آنکھ سے باہر نکل آیا، نرس نے ایک ٹشو پیپر سے اس کی آنکھ صاف کی،ڈاکٹروں کے مطابق یہ کیڑا پیٹ کے ذریعے آنکھ تک پہنچا تھا۔
بچے کے والد نے بتایا کہ میں بھی گھبرایا ہوا تھا کیونکہ میری بیٹی کی آنکھ سے کیڑا نکلا تھا اور مجھے اندیشہ تھا کہ بچی کا آپریشن کرنا پڑے گا یہ سب باتیں مجھے پریشان کررہی تھیں۔
