The news is by your side.

Advertisement

بالی وڈ کے معروف فلم ساز کیدار شرما کا تذکرہ

کیدار شرما بولی وڈ کے باکمال اور کام یاب فلم سازوں میں سے ایک تھے جو 29 اپریل 1999ء کو اس جہانِ فانی سے رخصت ہوئے۔ انھوں نے متعدد باصلاحیت فن کاروں کو انڈسٹری میں‌ متعارف کروایا۔ وہ ایک ہمہ جہت شخصیت تھے اور فنونِ‌ لطیفہ کے مختلف شعبوں میں گہری دل چسپی رکھتے تھے۔

وہ 12 اپریل 1910ء کو ناروال (پاکستان) میں پیدا ہوئے۔ کیدار نے امرتسر میں تعلیم مکمل کی اور روزگار کی تلاش میں ممبئی آ گئے۔ 1933ء میں کیدار کو دیوکی بوس کی ہدایت کاری میں بننے والی فلم ”پران بھگت” دیکھنے کا موقع ملا۔ اس فلم نے انھیں بہت متاثر کیا اور کیدار نے فلم نگری میں کیریئر بنانے کا فیصلہ کیا، اس خواب کی تکمیل کے لیے انھوں نے کولکتہ کا رخ کیا جہاں کسی طرح دیوکی بوس سے ملاقات ہوگئی اور انہی کی سفارش پر نیو تھیٹر میں بطور سنیماٹوگرافر کام ملا۔

سنیماٹوگرافر کی حیثیت سے کیدار کی پہلی فلم ‘سیتا’ تھی۔ اس کے بعد نیو تھیٹر کی فلم ‘انقلاب’ میں انھیں ایک چھوٹا سا کردار نبھانے کو ملا اور 1936ء میں فلم ”دیو داس” نے انھیں ایک باصلاحیت فن کار ثابت کرتے ہوئے فلمی کیریئر بنانے کا موقع فراہم کیا۔بعد میں‌ انھوں نے بطور ڈائریکٹر اپنی شناخت بنائی۔ “چتر لیکھا” وہ فلم تھی جس نے انھیں ڈائریکٹر کی حیثیت سے کام یاب کیا۔ انھوں نے راج کپور کو پہلی مرتبہ سلور اسکرین پر پیش کیا تھا۔ 1950ء میں کیدار نے فلم ”باورے نین” بنائی اور گیتا بالی کو پہلی مرتبہ بطور اداکارہ کام کرنے کا موقع دیا۔ ان کی ایک فلم ”جوگن” سپر ہٹ ثابت ہوئی جس میں دلیپ کمار اور نرگس نے اہم کردار ادا کیے تھے۔

کیدار جن فن کاروں کے کام سے خوش ہوتے، انھیں انعام میں‌ کچھ رقم ضرور دیتے تھے۔ راج کپور، دلیپ کمار، گیتا بالی اور نرگس نے بھی ان سے انعام وصول کیا تھا۔ وہ نغمہ نگار بھی تھے اور متعدد فلموں کے لیے گیت لکھے۔ تقریباً پانچ دہائیوں تک فلمی سفر جاری رکھنے والے کیدار نے سنیما کے شائقین اور ناقدین سے بھی اپنے کمالِ‌ فن اور صلاحیتوں کی داد پائی۔

Comments

یہ بھی پڑھیں