The news is by your side.

Advertisement

یومِ‌ وفات: ماسٹر محمد صادق پاکستان کے واحد سازندے تھے جن کا ہارمونیم کا انسٹرومینٹل کیسٹ ریلیز ہوا تھا

پاکستان کے مشہور موسیقار اور ہارمونیم نواز ماسٹر محمد صادق 5 جولائی 1987ء کو راولپنڈی میں وفات پاگئے تھے۔ آج ان کی برسی ہے۔ وہ ماسٹر محمد صادق پنڈی والے کے نام سے معروف تھے۔

ماسٹر محمد صادق 1923ء میں راولپنڈی میں پیدا ہوئے تھے۔ ان کا خاندان فنِ‌ موسیقی اور گائیکی سے وابستہ تھا۔ ان کے والد استاد نادر علی اور تایا استاد فیروز خاں نشی خاں والے اپنے زمانے کے معروف طبلہ نواز تھے۔ ماسٹر محمد صادق نے انہی سے طبلہ بجانا سیکھا اور گجرات کے میاں نبی بخش کالرے والے اور استاد کرم الٰہی ربابی سے موسیقی کی تعلیم حاصل کی۔

اس زمانے میں ہارمونیم ایک مقبول ساز تھا اور موسیقی کی محافل میں‌ اس کا استعمال عام تھا۔ ماسٹر محمد صادق ہارمونیم بجانے میں اپنا ثانی نہیں رکھتے تھے۔ وہ پاکستان کے واحد ہارمونیم نواز تھے جن کے ہارمونیم کا انسٹرومینٹل کیسٹ جاری ہوا تھا۔

ان کے فن پر لوک ورثہ اور پاکستان ٹیلی وژن نے خصوصی ویڈیو فلمیں تیار کی تھیں۔ ماسٹر محمد صادق کے شاگردوں میں معروف گلوکارہ مالا اور ان کی بہن شمیم نازلی کے نام سرفہرست ہیں۔

ماسٹر محمد صادق کو راولپنڈی میں قبرستان ڈھوک الٰہی بخش میں سپردِ‌ خاک کیا گیا۔

Comments

یہ بھی پڑھیں