ناصر کاظمی کی بطور شاعر مقبولیت کی ایک وجہ ان کا وہ طرزِ بیان ہے جس میں احساس کی شدّت کے ساتھ بے پناہ سوز و گداز اور تحیّر بھی شامل ہے۔ آج اردو زبان کے اس مقبول شاعر کی برسی ہے۔ ناصر کاظمی 2 مارچ 1972ء کو انتقال کرگئے تھے۔ ان کے مدفن پر موجود کتبے پر اُنہی کا ایک شعر کندہ ہے۔
دائم آباد رہے گی دنیا
ہم نہ ہوں گے کوئی ہم سا ہو گا
اردو غزل کو ناصر کاظمی نے جو انفرادیت بخشی اور اسے جس لہجے میں برتا، وہ انھیں آج بھی زندہ رکھے ہوئے ہے۔ یہ دو شعر ملاحظہ کیجیے۔
دل دھڑکنے کا سبب یاد آیا
وہ تری یاد تھی اب یاد آیا
دل میں اک لہر سی اٹھی ہے ابھی
کوئی تازہ ہوا چلی ہے ابھی
ان اشعار کا موضوع حسن و عشق ہے اور ان میں وہ کسک نمایاں ہے جس کے لیے ناصر پہچانے گئے۔ ناقدین کے مطابق ناصر نے اردو شاعری کے روایتی مضامین یعنی زندگی کی تلخیوں، محرومیوں، سرشاری اور حسرتوں کو بڑی شدّت سے اپنے اشعار میں سمویا ہے اور کمال یہ ہے کہ انھوں نے روایتی شاعری سے انحراف کیے بغیر جدید لب و لہجہ اپنایا، جو عام فہم بھی تھا اور نہایت دل نشیں بھی۔
ناصر کا ایک مشہور شعر پڑھیے۔
ہمارے گھر کی دیواروں پہ ناصر
اداسی بال کھولے سو رہی ہے
اردو کے اس بے مثل شاعر کا اصل نام سیّد ناصر رضا کاظمی تھا۔ وہ 8 دسمبر 1952ء کو انبالہ میں پیدا ہوئے۔ ان کے والد سیّد محمد سلطان کاظمی فوج میں صوبے دار میجر تھے۔ والدہ بھی تعلیم یافتہ اور انبالہ میں اسکول ٹیچر تھیں۔ یوں وہ ایک خوش حال گھرانے کے فرد تھے جس نے بچپن لاڈ پیار میں گزارا۔ تعلیم حاصل کرتے ہوئے گلستاں، بوستاں، شاہنامۂ فردوسی، قصہ چہار درویش، فسانۂ آزاد، الف لیلٰی، صرف و نحو اور اردو شاعری کی کتابیں بھی پڑھ لیں۔ کم عمری میں ہی شاعری شروع کر دی تھی۔ ان کا ترنم بہت اچھا تھا۔
ناصر کاظمی نے دسویں کا امتحان مسلم ہائی اسکول انبالہ سے پاس کیا۔ بی اے کے لیے لاہور گورنمنٹ کالج میں داخلہ لیا، لیکن تقسیمِ ہند کے ہنگاموں کے سبب تعلیم چھوڑنی پڑی۔ آزادی سے قبل وہ ایک بڑے گھر میں نہایت آسودہ زندگی بسر کررہے تھے لیکن تقسیم کے بعد پاکستان میں انھوں نے چھوٹے سے معمولی گھر میں نوکریاں کرتے ہوئے زندگی گزار دی۔
عوامی مقبولیت حاصل کرنے والے اس شاعر کی لفظیات اور ان کی حسّیات کا پیمانہ رومان رہا، لیکن وہ جس عہد اور سماج سے جڑے ہوئے تھے، اُس کے مسائل کو بھی نظر انداز نہیں کرسکے اور چھوٹی بحروں کے ساتھ منفرد استعاروں سے یوں اپنے کلام کو سجایا کہ شہرت ان کا مقدر بنی۔ ناصر کا پہلا مجموعۂ کلام ’برگِ نے‘ سنہ 1954ء میں منظرِعام پر آیا تھا جسے زبردست پذیرائی نصیب ہوئی۔ اس کے بعد ’پہلی بارش‘، ’نشاطِ خواب‘، ’دیوان‘ اور ’سُر کی چھایا‘ کے نام سے ان کی کتابیں شایع ہوئیں۔ وہ ایک اچھے نثر نگار بھی تھے اور ان کے مضامین کا ایک مجموعہ بھی شایع ہوا۔ ناصر کاظمی معروف ادبی رسالوں ’اوراقِ نو‘ ، ’ہمایوں‘ اور ’خیال‘ کی مجلسِ ادارت میں شامل تھے۔ بعد میں ریڈیو پاکستان لاہور سے بطور اسٹاف ایڈیٹر وابستہ ہوگئے۔
ناصر کاظمی کو لاہور میں مومن پورہ کے قبرستان میں سپردِ خاک کیا گیا۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں