The news is by your side.

Advertisement

بابائے جمہوریت نوابزادہ نصراللہ خان کی برسی

نوابزادہ نصراللہ خان کو پاکستان کی سیاسی تاریخ میں ’’بابائے جمہوریت‘‘ کے نام سے ہمیشہ یاد رکھا جائے گا۔ نام ور سیاست دان نوابزادہ نصراللہ خان 27 ستمبر 2003 وفات پاگئے تھے اور آج ان کی برسی ہے۔ مجلسِ احرار سے اپنا سیاسی سفر شروع کرنے والے نوابزادہ نصراللہ قیامِ پاکستان کے بعد مسلم لیگ میں شامل ہوگئے تھے اور پاکستان میں مختلف سیاسی ادوار میں جمہوریت کے لیے اپنا کردار ادا کرتے رہے۔

نوابزادہ نصراللہ خان 1918 میں پیدا ہوئے تھے۔ انھوں نے 1933 میں عملی سیاست میں حصّہ لینا شروع کیا اور قیامِ پاکستان کے بعد 1950 میں پنجاب اسمبلی کے رکن منتخب ہوئے۔ انھوں نے حسین شہید سہروردی کے ساتھ عوامی لیگ کی بنیاد رکھی اور بعد میں پاکستان جمہوری پارٹی کے نام سے اپنی علیحدہ سیاسی جماعت قائم کی۔

1964 میں نوابزادہ نصراللہ خان نے کمبائنڈ اپوزیشن پارٹیز کے نام سے ایک اتحاد قائم کیا اور اسی سال منعقدہ صدارتی انتخابات میں محترمہ فاطمہ جناح کو اپنا امیدوار نام زد کیا۔ نوابزادہ نصراللہ خان متعدد سیاسی تحاریک کے ساتھ جمہوری پارٹیوں، مختلف سیاسی گروہوں اور بااثر قبائلی شخصیات پر مشتمل اتحاد کے قیام میں متحرک اور فعال رہے جن میں پاکستان ڈیمو کریٹک موومنٹ، جمہوری مجلس عمل، یو ڈی ایف، پاکستان قومی اتحاد، ایم آر ڈی، آل پارٹیز کانفرنس، این ڈی اے اور اے آر ڈی کے نام شامل ہیں۔ انھیں خان گڑھ میں ان کے آبائی قبرستان میں سپردِ خاک کیا گیا۔

Comments

یہ بھی پڑھیں