پاکستان کے معروف موسیقار رحمٰن ورما 11 اگست 2007ء کو وفات پاگئے تھے آج ان کی برسی ہے وہ مشہور فلمی موسیقار جی اے چشتی کے شاگرد اور موسیقار کمال احمد کے استاد تھے۔
رحمٰن ورما کی پہلی فلم باغی (1956) تھی۔ اس کے بعد انھیں ایک اور فلم ملی اور ان دونوں کی کام یابی نے رحمٰن ورما کو ایکشن اور کاسٹیوم فلموں کے لیے بہترین موسیقار سمجھا جانے لگا۔
رحمٰن ورما کا اصل نام عبدالرحمٰن تھا۔ وہ 1927ء میں پیدا ہوئے تھے۔ قیام پاکستان سے پہلے انھوں نے موسیقار کی حیثیت سے فلموں کے لیے کام کرنا شروع کردیا تھا۔ تقسیمِ ہند کے بعد وہ پاکستان آگئے۔
پاکستان میں 1955ء میں رحمٰن ورما نے دیار حبیب کے لیے ایک نعت ریکارڈ کروائی جو بہت مقبول ہوئی اور یوں یہاں ان کا فلمی سفر شروع ہوا۔ بطور سولو موسیقار ان کی پہلی فلم ’’باغی‘‘ تھی اور آخری فلم ’’دارا‘‘ 1976ء میں نمائش پذیر ہوئی۔ انھوں نے مجموعی طور پر 32 فلموں کے لیے موسیقی ترتیب دی، جن میں دربار، آخری نشان، عالم آرا، ایک تھی ماں، بیٹا، کالا پانی، خاندان، نبیلہ، غدار، سسی پنہوں، سرِفہرست ہیں۔
