کراچی: شہر قائد کے مختلف علاقوں میں بارش کے دوران کرنٹ لگنے سے 5 افراد جاں بحق ہوگئے۔
تفصیلات کے مطابق کراچی کے مختلف علاقوں میں گرج چمک کے ساتھ بارش ہوئی اس دوران کرنٹ لگنے سے 5 افراد زندگی کی بازی ہار گئے۔
ریسکیو ذرائع کے مطابق ہجرت کالونی میں کرنٹ لگنے سے 8 سالہ ارمان جاں بحق ہوگیا، ناظم آباد موسیٰ کالونی کے قریب کرنٹ لگنے سے 2 بھائی جاں بحق ہوگئے۔
پولیس کے مطابق سائٹ ایریا میں ہوٹل میں بیٹھے 2 افراد پر بجلی کے تار ٹوٹ کر گرگئے جس کے نتیجے میں وہ موقع پر ہی جاں بحق ہوگئے، جاں بحق افراد کی شناخت 45 سالہ عبدالمنان اور 35 سالہ عبدالرؤف کے ناموں سے ہوئی ہے، اورنگی ٹاؤن میں ایک شخص کرنٹ لگنے سے جان کی بازی ہار گیا۔
مزید پڑھیں: کراچی کے کس علاقے میں سب سے زیادہ بارش ریکارڈ کی گئی؟
دوسری جانب بارش کے باعث کے الیکٹرک کے متعدد فیڈرز ٹرپ کرگئے جس کے باعث کورنگی، شاہ فیصل کالونی، ملیر، گلشن اقبال، پی آئی بی، گلستان جوہر سمیر کئی علاقوں میں بجلی کی فراہمی معطل ہوگئی۔
یاد رہے کراچی میں جولائی سے شروع ہونے والی مون سون بارشوں میں کرنٹ لگنے کے واقعات میں 30 سے زائد افراد جاں بحق ہوگئے تھے۔
خیال رہے کہ نیپرا نے کراچی میں بارشوں کے دوران کرنٹ لگنے سے ہلاکتوں کا نوٹس لیا تھا اور 19 جانوں کے ضیاع کا ذمہ دار کے الیکٹرک کو قرار دیا تھا۔
