بیجنگ/جنیوا: نہایت مہلک اور نئے وائرس COVID 19 سے دنیا بھر میں ہلاکتوں کی تعداد 2858 ہو گئی ہے، عالمی ادارہ صحت کے سربراہ ٹیڈروس نے کہا ہے کہ یہ ڈرنے کا نہیں عالمی اقدامات کا وقت ہے۔
تفصیلات کے مطابق چین میں نئے مہلک کرونا وائرس سے ہلاکتوں میں کمی آنا شروع ہو گئی ہے تاہم دوسری طرف اس نے دنیا میں تیزی سے پھیلنا بھی شروع کر دیا ہے، اب تک 54 ممالک میں وائرس کے کیسز کی تصدیق کی جا چکی ہے۔
نئے وائرس کووِڈ 19 سے دنیا بھر میں ہلاک ہونے والوں کی تعداد 2858 ہو گئی ہے، جب کہ متاثرین کی تعداد 83,379 تک پہنچ گئی، چین میں وائرس سے ہلاک افراد کی تعداد 2 ہزار 788 ہو چکی ہے، گزشتہ روز چین میں 44 مزید افراد وائرس سے ہلاک ہوئے۔
24 گھنٹوں کے دوران 7 نئے ممالک میں کرونا وائرس رپورٹ، عالمی ادارہ صحت
جنوبی کوریا میں کرونا وائرس سے مزید 256 افراد متاثر ہو گئے ہیں، جس کے بعد متاثرہ افراد کی تعداد 2 ہزار 22 ہو گئی، جاپان میں وائرس کے اب تک 214 کیس رپورٹ ہو چکے ہیں، اٹلی میں 24 گھنٹوں میں کرونا وائرس کے مزید 250 کیس سامنے آ گئے، جس سے مجموعی تعداد 655 ہو گئی۔
کرونا وائرس سے صحت یاب ہونے والوں کی تعداد بھی بڑھنے لگی ہے، مجموعی طور پر 36,533 مریض صحت یاب ہو چکے ہیں، جب کہ 8,099 مریضوں کی حالت تشویش ناک ہے۔
سربراہ ورلڈ ہیلتھ آرگنائزیشن ٹیڈ روس نے اپنے تازہ بیان میں خبردار کیا ہے کہ کرونا وائرس عالمی وبا بن سکتی ہے، ہم اس وقت نازک صورت حال سے دوچار ہیں، متاثرہ ممالک کی حکومتیں ہنگامی اقدامات کر رہی ہیں، یہ ڈرنے کا نہیں عالمی اقدامات کرنے کا وقت ہے۔
