کراچی: نئے اور مہلک وائرس COVID 19 سے دنیا بھر میں اموات 16558 ہو گئی ہیں، جب کہ مریضوں کی مجموعی تعداد 3 لاکھ 81 ہزار 653 ہو گئی۔
تفصیلات کے مطابق فلو سے مشابہ نئے کرونا وائرس نے دنیا کے 195 ممالک اور علاقوں کو لپیٹ میں لے لیا ہے، اموات کی تعداد ساڑھے سولہ ہزار بھی بڑھ گئیں، جب کہ متاثرین کی تعداد چار لاکھ کے قریب پہنچ گئی ہیں، دوسری طرف 102,429 افراد مہلک وائرس سے صحت یاب ہو گئے ہیں۔
اٹلی میں ہلاکتوں کی تعداد بڑھ کر 6077 ہو گئی، جب کہ 63927 افراد متاثر ہوئے، ان میں صرف ساڑھے سات ہزار مریض صحت یاب ہوئے۔ چین میں اموات 3,277 تک پہنچ گئیں، امریکا میں کرونا وائرس سے مزید 29 افراد ہلاک ہونے کے بعد تعداد 582 ہو گئی جب کہ مریضوں کی مجموعی تعداد 46145 تک پہنچ گئی۔
اسپین میں وائرس سے 2311 افراد ہلاک جب کہ 35136 افراد متاثر ہیں، برطانیہ میں ہلاکتوں کی تعداد 335 ہو گئی، جب کہ 6650 متاثر ہیں، ہالینڈ میں کرونا سے 213 افراد ہلاک اور 4749 متاثر ہیں، سعودی عرب میں 562 افراد کرونا وائرس سے متاثر ہو چکے ہیں۔
جنوبی کوریا میں وائرس سے ہلاکتیں بڑھ کر 120 ہو گئی ہیں، متاثرہ افراد کی تعداد 9,037 ہے۔ جرمنی میں 123 ہلاک جب کہ 29,056 افراد متاثر ہوئے ہیں۔
بھارت میں کرونا وائرس کے متاثرین کی تعداد 491 ہو گئی ہے، بھارتی میڈیا کے مطابق 30 ریاستوں اور علاقوں میں لاک ڈاؤن کر دیا گیا ہے، جس کی خلاف ورزی پر متعدد افراد کے خلاف مقدمات درج کیے گئے، کرونا وائرس کے باعث بھارت اور نیپال کی سرحد بند کر دی گئی ہے، نئی دہلی میں لاک ڈاؤن کے باعث شاہین باغ کا دھرنا ختم کر دیا گیا، شاہین باغ میں بھارت کے متنازع قانون شہریت کے خلاف احتجاج کیا جا رہا تھا۔
