کراچی: کرونا وائرس کی عالمگیر وبا سے ہلاکتیں بڑھ کر 160,767 ہو گئی ہیں، دنیا بھر میں کرونا کے مریضوں کی تعداد بھی بڑھ کر 23 لاکھ 32 سے زائد ہو گئی۔
تفصیلات کے مطابق کو وِڈ نائنٹین نے دنیا کے 210 ممالک اور علاقوں کو اپنی لپیٹ میں لیا ہوا ہے، ہر گزرتے لمحے کے ساتھ مزید کیسز سامنے آ رہے ہیں اور مزید ہلاکتیں رپورٹ ہو رہی ہیں۔
دوسری طرف سائنس دان کرونا وائرس سے بچاؤ کے لیے ویکسینز کی تیاری اور مرض سے نجات کے لیے مختلف قسم کی ادویہ پر بھی تحقیقات کر رہے ہیں، ایسی ادویہ پر توجہ مرکوز کی گئی ہے جن سے انسانی قوت مدافعت میں اضافہ ہو، دنیا بھر کے اسپتالوں میں خصوصی کیئر کے نتیجے میں اب تک کرونا کے 6 لاکھ مریض صحت یاب ہو چکے ہیں۔
سب سے زیادہ متاثرہ ملک امریکا میں کرونا وائرس کے مریضوں کی تعداد بڑھ کر 7 لاکھ 38 ہزار سے زائد ہوگئی، وائرس کے باعث اموات بھی بڑھ کر 39 ہزار 15 ہو گئی ہیں، اٹلی میں کرونا وائرس کے مریضوں کی تعداد ایک لاکھ 75 ہزار سے زائد ہوگئی، جب کہ وائرس کے باعث اموات 23 ہزار227 ہو گئی ہیں، اسپین میں کرونا وائرس کے مریضوں کی تعداد ایک لاکھ 94 ہزار سے زائد ہوگئی اور اموات 20 ہزار 639 ہو گئی ہیں۔
فرانس میں کرونا وائرس کے مریضوں کی تعداد 1 لاکھ 51 ہزار سے زائد ہو گئی، جب کہ وائرس کے باعث اموات 19 ہزار 323 ہو گئیں، برطانیہ میں وائرس کے مریضوں کی تعداد 1 لاکھ 14 ہزار سے زائد ہو گئی، اور وائرس کے باعث اموات 15 ہزار 464 ہو گئیں، جرمنی میں کرونا کے مریضوں کی تعداد 1 لاکھ 43 ہزار سے زائد ہو گئی، جب کہ وائرس کے باعث اموات 4 ہزار 538 ہو گئیں۔
ترکی میں کرونا وائرس کے مریضوں کی تعداد 82 ہزار سے زائد ہوگئی، جب کہ وائرس کے باعث اموات 1 ہزار 890 ہو گئیں، ایران میں کرونا وائرس کے مریضوں کی تعداد 82 ہزار سے زائد ہوگئی، جب کہ وائرس کے باعث اموات 5 ہزار 31 ہو گئیں۔
