پاکستان کرکٹ بورڈ کے نئے ہائبرڈ ماڈل پر پیش رفت ہوئی ہے اور ایشین کرکٹ کونسل کے ورچوئل اجلاس میں نیا ماڈل تسلیم کرنے پر بات ہوگی ہے۔
اے آر وائی نیوز کے مطابق ایشیا کپ رواں سال ستمبر میں پاکستان میں شیڈول ہے تاہم بھارت کی جانب سے اس میں شرکت کے لیے پاکستان آنے سے انکار کے بعد ایونٹ کے انعقاد پر غیر یقینی کے بادل منڈلا رہے ہیں۔ اس حوالے سے پی سی بی نے ہائبرڈ ماڈل بھی پیش کیا تھا تاہم کئی ممالک نے اس کی توثیق نہیں کی۔
اس صورتحال کے بعد ایشیا کپ ہوگا یا نہیں؟ ہوگا تو کب ہوگا اور کہاں ہوگا اور کیا ہائبرڈ ماڈل پر ہوگا؟ یہ تمام سوالات شکوک وشبہات کو تقویت دے رہے تھے تاہم اطلاعات کے مطابق اب پاکستان کرکٹ بورڈ کی جانب سے پیش کردہ نئے ہائبرڈ ماڈل پر پیش رفت ہوئی ہے اور رواں ہفتے ایشین کرکٹ کونسل کے ورچوئل اجلاس میں نیا ماڈل تسلیم کیے جانے کے حوالے سے بات چیت ہوگی اور دوسرے وینیو کا بھی فیصلہ ہوگا۔
ذرائع کا کہنا ہے کہ ایشیا کپ کے انعقاد کے حوالے سے کوئی بھی حتمی فیصلہ رواں ہفتے ہونے کا امکان ہے۔
چیئرمین پی سی بی مینجمنٹ کمیٹی نجم سیٹھی نے گزشتہ اے سی سی میٹنگ میں نیا ہائبرڈ ماڈل پیش کیا تھا جس کے تحت پانچ ٹیمیں پہلے راؤنڈ کے مقابلے پاکستان میں کھیلیں گی جس کے بعد باقی تمام میچز نیوٹرل وینیو پر کرائے جائیں گے۔
واضح رہے کہ پاکستان روز اول سے اصولی مؤقف پر ڈٹا ہوا ہے اور سربراہ پی سی بی نجم سیٹھی کئی انٹرویوز میں برملا کہہ چکے کہ ایشیا کپ کی میزبانی پر کوئی سمجھوتہ نہیں کیا جائے گا۔
نجم سیٹھی نے گزشتہ روز بھی بھارت کو خبردار کر دیا ہے کہ ایسا نہ ہو کہ ہم ایشیا کپ کے ساتھ ورلڈ کپ کا بھی بائیکاٹ کر دیں۔
