اسلام آباد: الیکشن کمیشن آف پاکستان نے سینیٹ امیدواروں کے تمام کوائف کی جانچ پڑتال آن لائن کرنے کا فیصلہ کیا ہے۔
تفصیلات کے مطابق ای سی پی سینیٹ امیدواروں کے کوائف کی جانچ پڑتال آن لائن کرے گی، کاغذات کی جانچ وزارت داخلہ، ایف آئی اے، نادرا اور نیب سے کی جائے گی۔
اس سلسلے میں ایف بی آر اور اسٹیٹ بینک سے بھی آن لائن رابطہ رکھا جائے گا، الیکشن کمیشن نے تمام متعلقہ اداروں کے سر براہان کو خطوط بھی ارسال کر دیے۔
خطوط میں نیب، نادرا، ایف بی آر، اسٹیٹ بینک اور وزارت داخلہ سے تعاون کی درخواست کی گئی ہے، الیکشن کمیشن نے کہا ہے کہ ہر ادارہ فوری طور پر اپنا فوکل پرسن نامزد کر کے آگاہ کرے۔
سینیٹ الیکشن: بلاول کا صدارتی آرڈیننس چیلنج کرنے کا اعلان
الیکشن کمیشن کے مطابق ریٹرننگ افسران کو آن لائن جدید ضروری سہولتیں فراہم ہوں گی، متعلقہ اداروں سے ملنے والی معلومات ریٹرننگ افسران کو مہیا کی جائیں گی۔
الیکشن کمیشن سیکریٹریٹ میں ڈیجیٹل سہولت سینٹرز قائم کر دیے گئے، صوبائی الیکشن کمشنرز کے دفاتر میں بھی ڈیجیٹل سہولت سینٹرز قائم کیے گئے ہیں۔
ادھر ذرائع نے کہا ہے کہ مارچ کے پہلے 3 دن میں سینیٹ الیکشن کی تاریخ مقرر کی جا سکتی ہے، الیکشن کمیشن کل حتمی شیڈول جاری کرے گا، جب کہ کاغذات نامزدگی جاری ہو چکے ہیں۔
واضح رہے کہ حکومت ووٹ کی خرید و فروخت کو روکنے کے لیے سینیٹ الیکشن اوپن بیلٹ پر کرانے کے لیے صدارتی آرڈیننس لا چکی ہے، جسے پاکستان پیپلز پارٹی کے چیئرمین بلاول بھٹو زرداری نے چیلنج کرنے کا اعلان کر دیا ہے۔
