The news is by your side.

کراچی‌ میں اسٹریٹ کرائمز پر قابو پانے کے لئے شاہین فورس میدان میں آگئی

کراچی : شہر قائد میں اسٹریٹ کرمنلز کے خلاف مؤثر ایکشن کے لئے شاہین فورس متعارف کرا دی گئی۔

تفصیلات کے مطابق کراچی میں اسٹریٹ کرائم کی روک تھام کے لئے پولیس کی ایک اور حکمت عملی سامنے آگئی۔

کراچی میں اسٹریٹ کرمنلز کے خلاف مؤثر ایکشن کے لئے شاہین فورس کے قیام کا فیصلہ کرلیا گیا۔

کراچی پولیس چیف جاوید عالم اوڈھو نے زونل ڈی آئی جیز کے ہمراہ شاہین فورس کی تشکیل پر میڈیا بریفنگ دیتے ہوئے بتایا کہ موٹر سائیکل پر مبنی ایک شاہین فورس قائم کر رہے ہیں۔

جاویدعالم اوڈھو کا کہنا تھا کہ بدقسمتی سے اس ماہ وارداتوں میں 10افراد کی جان گئی،12زخمی ہوئے جبکہ پندرہ پولیس مقابلے بھی ہوئے ہیں ،14ملزمان گرفتار،5مارے گئے۔

کراچی پولیس چیف نے کہا کہ فیصلہ کیا ہے کہ جرائم کی اس چھوٹی سے لہر پر جلد قابو پالیں، شاہین فورس کا افتتاح کا یہ وقت مناسب ہے۔

انھوں نے بتایا کہ 300 موٹر سائیکلوں پر مشتمل یہ فورس ہوگی ، 2 موٹر سائیکلوں پر 4جوان گشت کریں گے، بیشتر جوان ایلیٹ کورس کرنے والے اور کمانڈوز ہوں گے۔

جاویدعالم اوڈھو نے کہا کہ کوشش ہے کہ ان بائیکس میں ٹریکرزلگا کر مانیٹر کریں، کچھ موٹرسائیکلوں میں ٹریکرز لگائے جا چکے ہیں باقی میں جلد لگا دیں گے۔

کراچی پولیس چیف کا کہنا تھا کہ ابتدامیں ہر زون میں 100 موٹر سائیکلیں فراہم کی جارہی ہیں ، پیٹرولنگ تھانہ لیول پر ہوتی ہے اس بار سینٹرلائزڈکررہے ہیں۔

انھوں نے مزید کہا کہ جہاں افسران سمجھیں گے وہاں شاہین فورس تعینات ہوگی ، فورس کوتھانے کے منشی ،ایس ایچ او کے رحم و کرم پر نہیں چھوڑا جائے گا۔

جاویدعالم اوڈھو نے بتایا کہ کنٹرول روم بھی اس یونٹ کی مانیٹرنگ کیلئےاعلیٰ سطح پر بنارہے ہیں، کوشش ہےاس کا انتظام چلانے کیلئےمخصوص افسر مقرر کریں۔

Comments

یہ بھی پڑھیں