The news is by your side.

کراچی میں حلقہ بندیوں کے حوالے سے اہم پیشرفت

کراچی : ایم کیو ایم اور پیپلز پارٹی کے درمیان ہونے والے چارٹر آف رائٹس کے معاملے پر اہم پیشرفت سامنے آئی ہے۔

اس حوالے سے ذرائع کا کہنا ہے کہ ایم کیو ایم کی جانب سے پیپلزپارٹی پر حلقہ بندیاں درست کرانے کے حوالے سے زور دیا جارہا ہے۔

ایم کیو ایم ذرائع کے مطابق پیپلز پارٹی سے مطالبہ کیا گیا ہے کہ حلقہ بندیاں درست کرانے کے حوالے سے کیے گئے وعدے کو پورا کیا جائے۔

ذرائع کا کہنا ہے کہ کنونئیر ایم کیو ایم ڈاکٹر خالد مقبول صدیقی نے سابق صدر آصف علی زرداری سے ٹیلیفونک رابطہ کیا اور حلقہ بندیوں، ووٹر لسٹوں کی درستگی سمیت معاہدے پر عمل درآمد کے حوالے سے گفتگو کی۔

آصف زرداری کی جانب سے ڈاکٹر خالد مقبول صدیقی کو مکمل تعاون اور معاہدے کی رفتار پر عمل تیز کرانے کی یقین دہانی کرائی گئی ہے۔

ذرائع کے مطابق کنونئیر ایم کیو ایم کی ہدایت پر ایم کیو ایم رہنماؤں کا ناصر شاہ سے بھی رابطہ ہوا، ایم کیو ایم اور پیپلز پارٹی کے درمیان ایک سے دو روز میں ملاقات کا امکان ہے۔

وزیراعلیٰ سندھ مراد علی شاہ کی امریکا سے واپسی کے بعد ملاقات طے کی جائے گی، حلقہ بندیوں کے حوالے سے ایم کیو ایم تحفظات کو دور اور لائحہ عمل طے کیا جائے گا۔

ایم کیو ایم نے حلقہ بندیوں سمیت دیگر معاملات کو اسمبلی میں لانے اور قانون سازی پر زور دیا ہے، ایم کیو ایم نے پیغام دیا ہے کہ پہلے حلقہ بندیوں کا معاملہ حل کیا جائے اس سے ہمارا مینڈیٹ جڑا ہے۔

Comments

یہ بھی پڑھیں