The news is by your side.

Advertisement

نوکری کے پہلے دن ڈیلیوری مین کے ساتھ لفٹ میں خوف ناک واقعہ

ادانہ: ترکی کے ایک شہر میں نوکری کے پہلے دن ڈیلیوری مین کے ساتھ لفٹ میں جان لیوا حادثہ پیش آ گیا۔

غیر ملکی میڈیا کے مطابق ترکی کے شہر ادانہ میں نیل پولات نامی شہری نے گروسری ڈیلیوری کی نوکری شروع کی تو اسے گمان بھی نہیں تھا کہ نوکری کا یہ پہلا دن اس کی زندگی کا آخری دن بن جائے گا۔

چار بچوں کا باپ نیل پولات اس وقت بالکل اچانک خوف ناک موت کا شکار ہو گیا جب وہ ایک ٹرالی کے ساتھ الٹے قدموں سے لفٹ میں داخل ہوا، اندر ایک خلا تھا جس کی وجہ سے وہ 9 منزل نیچے جا گرا۔

ترکی اخبار کے مطابق 47 سالہ شہری نے اسی دن ہی ایک نئے گروسری اسٹور پر ڈیلیوری مین کی حیثیت سے ملازمت کی شروعات کی تھی، وہ ایک گھر پر گروسری سے بھری ایک ٹرالی پہنچانے گیا تھا لیکن بدقسمتی سے واپس پر مہلک حادثہ پیش آ گیا۔

سامان پہنچانے کے بعد وہ خالی ٹرالی لے کر لفٹ میں اپنی پشت کی طرف سے داخل ہو رہا تھا، اس لیے اسے پتا نہ چل سکا کہ اندر ابھی لفٹ نہیں آئی ہے اور وہ ابھی اوپری منزل پر ہے، اس لیے جب اس نے اندر قدم رکھا تو سیدھا نو منزل نیچے گر گیا۔

اپارٹمنٹ کے رہائشیوں نے فوری طور پر پولیس اور طبی عملے کو اطلاع کر دی لیکن بہت دیر ہو چکی تھی، پولات تقریباً 40 میٹر اونچائی سے گرا تھا، اس لیے وہ گرتے ہی مر گیا تھا۔

یہ معلوم نہیں ہو سکا ہے کہ جب لفٹ اوپری منزل پر تھی تو لفٹ کا دروازہ کیسے کھلا، پولیس اس عجیب واقعے کی تحقیقات کر رہی ہے۔

Comments

یہ بھی پڑھیں