The news is by your side.

سندھ میں دہشت گردوں سمیت مفرور ملزمان کی تعداد 50 ہزار سے تجاوز کر گئی

کراچی: سندھ میں دہشت گردوں سمیت مفرور ملزمان کی تعداد 50 ہزار سے تجاوز کر گئی، عدالت نے مفرور ملزمان کو فوری گرفتار کرنے کا حکم دے دیا۔

تفصیلات کے مطابق سندھ ہائیکورٹ میں پولیس نے رپورٹ پیش کرتے ہوئے بتایا کہ سندھ میں دہشت گردوں سمیت مفرور ملزمان کی تعداد 50 ہزار سے تجاوز کر گئی ہے۔ کراچی سمیت سندھ کے دیگر اضلاع میں 50 ہزار 180 ملزمان مفرور ہیں۔

رپورٹ میں کہا گیا ہے کہ سب سے زائد مفرور ملزمان کی تعداد کراچی میں ہے، کراچی میں دہشت گردوں سمیت 22 ہزار 127 ملزمان مفرور ہیں۔ لاڑکانہ ڈویژن مفرور ملزمان میں دوسرے نمبر پر ہے۔

رپورٹ کے مطابق لاڑکانہ ڈویژن میں 13 ہزار 135 ملزمان مفرور ہیں، حیدر آباد ڈویژن میں 6 ہزار 301 ملزمان مفرور ہیں۔

پولیس رپورٹ میں کہا گیا کہ سکھر ڈویژن میں 3 ہزار 841، میرپور خاص میں 742 اور شہید بے نظیر آباد ڈویژن میں 3 ہزار 970 ملزمان مفرور ہیں۔

عدالت نے مفرور ملزمان کو فوری گرفتار کرنے کا حکم دے دیا۔ عدالت نے کہا کہ ملزمان کو گرفتار کیا جائے، ان کے نام اخبارات میں شائع کیے جائیں۔

پولیس نے بتایا کہ مفرور ملزمان کے شناختی کارڈ بلاک کرنے کے لیے نادرا کو لکھا ہے۔ ملزمان کے نام ایگزٹ کنٹرول لسٹ (ای سی ایل) پر ڈالنے کے لیے وفاقی تحقیقاتی ادارے (ایف آئی اے) کو بھی لکھا ہے۔

Comments

یہ بھی پڑھیں