لاہور : ڈی جی اینٹی کرپشن پنجاب ندیم سرور عمران خان پرقاتلانہ حملےکی تحقیقات میں معاونت کی بجائے ریکارڈ ضائع کرنے کی کوششیں کرنے لگے۔
تفصیلات کے مطابق عمران خان حملے کی جے آئی ٹی کا ریکارڈ پنجاب کی نگراں حکومت کا اگلا ہدف ہے۔
ڈی جی اینٹی کرپشن پنجاب ندیم سرور جے آئی ٹی کی معاونت کی بجائے ریکارڈ ضائع کرنے کی کوششیں کرنے لگے۔
ذرائع نے بتایا کہ بطور ڈی جی ندیم سرور نے جے آئی ٹی کے رکن اور ریکارڈ کے حامل افسر سید انور شاہ کو دفتر آنے سے روک دیا جبکہ جے آئی ٹی کے رکن افسر کا دفتر بھی سیل کردیا۔
ذرائع کا کہنا تھا کہ ڈی جی اینٹی کرپشن کی جانب سے جے آئی ٹی کے رکن سید انور شاہ پر جے آئی ٹی ریکارڈ کی فراہمی کیلئے دباؤ ڈالا جارہا ہے۔
ذرائع کے مطابق جے آئی ٹی کے رکن سید انور شاہ نے ریکارڈ ضائع کرنے کی کوششوں کے پیش نظر عدالت سے رجوع کرلیا۔
ذرائع نے بتایا کہ سید انور شاہ نے گوجرانوالہ کی انسداد دہشتگردی عدالت میں باضابطہ تحریری درخواست جمع کروا دی۔
ذرائع نے کہا ہے کہ عمران خان پر قاتلانہ حملے کی تحقیقات کرنے والی جے آئی ٹی نے نہایت قیمتی شواہد جمع کرکے انہیں ریکارڈ کا حصہ بنایا ہے اور ڈی جی اینٹی کرپشن پنجاب اپنے عہدے و اختیارات کا غلط استعمال کرکے ریکارڈ ضائع کرنے جیسے سنگین قانونی جرم کا ارتکاب کررہے ہیں۔
ذرائع کے مطابق چیئرمین تحریک انصاف عمران خان بھی جے آئی ٹی کی تحقیقات پر اثرانداز ہونے یا ریکارڈ ضائع کرنے کے حوالے سے اپنے خدشات کا اظہار کرچکے ہیں۔
