کراچی: ڈی جی رینجرز میجر جنرل بلال اکبر کا ایم کیو ایم کے مرکز نائن زیرو کا دورہ جبکہ متحدہ کے پی آئی بی میں واقع عارضی مرکز میں بھی رینجرز کی بھاری نفری داخل ہوگئی۔
تفصیلات کے مطابق گزشتہ روز ایم کیو ایم کے مرکز پر طویل آپریشن اور سیل ہونے کے بعد رینجرز کی بھاری نفری ایک بار پھر ایم کیو ایم کے ہیڈ کوارٹر پہنچ گئی ہے جبکہ پی آئی پی میں واقع ایم کیو ایم کے پی آئی بی گھانچی ہال میں واقع عارضی مرکز کا بھی رینجرز نے گھیراؤ کرلیا ہے۔
پڑھیں: اے آر وائی کراچی کے دفتر پر حملہ کرنے والے 3 ماسٹر مائنڈ گرفتار
ڈی جی رینجرز میجر جنرل بلال اکبر نے نائن زیرو اور اطراف کی گلیوں کا دورہ کیا اور گزشتہ روز سیل ہونے والے دفاتر کا جائزہ لیتے ہوئے سیکیورٹی کی صورتحال پر اطمینان کا اظہار کیا۔ اس دوران رینجرز کی بھاری نفری نے نائن زیرو اور اطراف کی گلیوں کو مکمل بند کردیا تھا۔
مزید پڑھیں: ترجمان رینجرز کی 2013 سے جاری آپریشن کی رپورٹ جاری
میجر جنرل بلال اکبر نے سیکیورٹی کے انتظامات کا جائزہ لینے کے بعد جناح گراؤنڈ اور اُس سے متصل شہداء یادگار کا بھی دورہ کیا اور وہاں موجود اہلکاروں کو سیکیورٹی کے حوالے سے خصوصی ہدایات جاری کیں۔
دوسری جانب پی آئی بی میں واقع گھانچی ہال میں ایم کیو ایم کے عارضی مرکز میں رینجرز کی بھاری نفری داخل ہوگئی اس دوران علاقے کے داخلی و خارجی راستوں کو سیل کردیا گیا ہے جبکہ مرکز کے اندر متحدہ رہنماء فاروق ستار اور عامر خان موجود تھے۔رینجرز کی بھاری نفری نے عارضی مرکز میں مخصوص مقامات کی تلاشی بھی لی۔ متحدہ کے عارضی مرکز میں آئندہ روز میئر اور ڈپٹی میئر کے حوالے سے اہم اجلاس جاری تھا۔
بعد ازاں رینجرز کے ونگ کمانڈر کی جانب سے ایم کیو ایم کے رہنماء ڈاکٹر فاروق ستار سے مذاکرات کامیاب ہونے پر نفری عارضی مرکز سے واپس روانہ ہوگئی۔
