دبئی: متحدہ عرب امارات کی عدالت نے وائی فائی کنکشن فروخت کرنے والے ایشائی باشندے پر 50 ہزار درہم جرمانہ عائد کردیا جو پاکستانی کرنسی کے حساب سے 21 لاکھ روپے سے زائد بنتے ہیں۔
خلیج ٹائمز کی رپورٹ کے مطابق دبئی میں مقیم ایشیائی باشندے نے انٹرنیٹ سروس فراہم کرنے والی کمپنی نے کنکشن لیا اور پھر اسے اپنے پڑوسی کے ساتھ شیئر کیا۔
مذکورہ شخص کو گزشتہ برس دسمبر میں کمپنی کی شکایت پر گرفتار کر کے مقدمہ درج کیا گیا اور پھر اُسے عدالت میں پیش کیا گیا.
کمپنی نے مؤقف اختیار کیا کہ ایشیائی باشندے نے اپنی عمارت میں موجود دیگر لوگوں کو وائی فائی کنکشن فروخت کیا جو قانون کی خلاف ورزی ہے۔
ایشیائی باشندے نے عدالت میں اپنے جرم کا اعتراف کیا جس پر جج نے اُس پر پچاس ہزار درہم جرمانے کی سزا سنائی۔ عدالتی فیصلے میں کہا گیا ہے کہ مذکورہ شخص کمپنی کو عدالتی اخراجات بھی ادا کرے گا۔
رپورٹ کے مطابق دبئی میں رجسٹرڈ کمپنیوں کے علاوہ انٹرنیٹ فروخت کرنا جرم تصور کیا جاتا ہے، جس کی کم سے کم سزا پانچ ہزار درہم جبکہ زیادہ سے زیادہ تین سال قید ہے۔
