The news is by your side.

حج اور عمرہ سے متعلق مزید سہولیات فراہمی کا منصوبہ

ریاض: سعودی عرب میں حج اور عمرہ سے متعلق تمام سہولیات ڈیجیٹلی فراہم کرنے کے لیے کام جاری ہے، عازمین حج ای ویزا کے لیے درخواست دینے سے لے کر ہوٹلوں اور پروازوں کی بکنگ تک آسانی سے پورے دورے کا انتظام کر سکتے ہیں۔

اردو نیوز کے مطابق برطانوی حجاج کی کونسل کے سی ای او راشد موگرادیا کا کہنا ہے کہ سعودی عرب میں حج اور عمرہ شعبے کی تمام سطحوں پر بڑی ڈیجیٹل تبدیلی، خدمات کی فراہمی کو ہموار اور عازمین حج کے تجربات میں اضافہ کرے گی۔

جدہ میں حج ایکسپو 2023 سے خطاب کرتے ہوئے راشد موگرادیا کا کہنا تھا کہ یہ دیکھ کر بہت اچھا محسوس ہوا کہ خدمت فراہم کرنے والے ایسی مصنوعات اور خدمات تخلیق کرنے کے لیے سخت محنت کر رہے ہیں جو عازمین حج کے تجربات کو بڑھاتی ہیں۔

یاد رہے کہ عازمین کے لیے حج کو آسان بنانے کے لیے مفت اسمارٹ کارڈ شروع کرنے کے منصوبے کی رونمائی حج ایکسپو میں کی گئی، کارڈ میں عازمین حج کی ذاتی معلومات ہوں گی اور اسے الیکٹرانک ایپلی کیشن سے منسلک کیا جائے گا۔

کارڈ کی ڈویلمپنٹ وزارت حج و عمرہ اور اوقاف کی جنرل اتھارٹی کے درمیان ایک معاہدے کے بعد ہوئی ہے۔

راشد موگرادیا کا کہنا تھا کہ ایکسپو میں اپنے شراکت داروں کے ساتھ ملنا اور نئے لوگوں کے ساتھ جڑنا بہت اچھا رہا، نسک کا انٹر ایکٹو پویلین خاص طور پر متاثر کن تھا۔

واضح رہے کہ نسک عمرہ زائرین کی منصوبہ بندی اور بکنگ کا باضابطہ پلیٹ فارم ہے جسے گزشتہ سال وزیر حج و عمرہ توفیق الربیعہ نے شروع کیا تھا۔

نسک کے ساتھ دنیا بھر کے عازمین حج ای ویزا کے لیے درخواست دینے سے لے کر ہوٹلوں اور پروازوں کی بکنگ تک آسانی سے پورے دورے کا انتظام کر سکتے ہیں۔

راشد موگرادیا کا کہنا تھا کہ نسک بہت جلد بین الاقوامی عازمینِ حج کے لیے ایک آن لائن حج پورٹل کے لیے تیار ہے جس سے لوگ براہ راست پیکجز کا انتخاب اور بکنگ کر سکیں گے۔

Comments

یہ بھی پڑھیں