نیویارک: 7 کروڑ 60 لاکھ سال پرانے ڈائناسار کا ڈھانچا ‘قدیم’ حالت میں نیویارک میں نیلام کیا جا رہا ہے۔
تفصیلات کے مطابق اپنی نوعیت کا واحد فوسلائزڈ (پتھر بنا ہوا) ڈائناسارس ڈھانچا نیویارک میں 28 جولائی کو نیلامی کے لیے پیش کیا جائے گا، گورگوسارس کا یہ ڈھانچا 10 فٹ لمبا اور 22 فٹ طویل ہے۔
ٹویٹر پر امریکی نیلام گھر ’سوتھ بیز‘ نے اعلان کیا ہے کہ 76 ملین سال قدیم گورگوسارس (Gorgosaurus) نیلام کیا جا رہا ہے، امید ہے کہ یہ ڈھانچا نیلامی میں حاضرین کی توجہ کا مرکز ہوگا۔
نیلام گھر نے گورگوسارس کی حتمی بولی کا اندازہ 50 سے 80 لاکھ ڈالر لگایا ہے، کمپنی کا کہنا ہے کہ یہ تاریخ کا پہلا ڈائناسارس ڈھانچا ہے جو نیلامی کے لیے پیش کیا جا رہا ہے۔
Measuring 10 feet tall and 22 feet long, meet the first ever #Gorgosaurus skeleton to be offered at auction. 🦖
Watch as our #Dinosaur is put together in our #SothebysNewYork galleries, open for viewing 21 July ahead of its sale in our #GeekWeek auction 28 July. pic.twitter.com/dqR9oIUh16
— Sotheby’s (@Sothebys) July 5, 2022
نیلامی سے قبل 21 جولائی کو سوتھبی کی نیویارک گیلریوں میں تاریخ میں دل چسپی رکھنے والوں کے لیے اس ڈھانچے کی نمائش کا انعقاد بھی کیا جائے گا، نیلامی کے بعد یہ ڈھانچا نجی ملکیت میں چلا جائے گا۔
گورگوسارس گوشت خور تھے، یہ امریکا کے مغربی علاقوں اور کینیڈا میں پائے جاتے تھے، اور یہ ٹائیرانوسارس ریکس (Tyrannosaurus rex) سے بھی 10 ملین سال پرانے تھے۔
گورگوسارس کا یہ مشہور ڈھانچا 2018 میں امریکا کے مغرب میں واقع پہاڑی علاقے مونٹانا کے دریائے جوڈتھ سے دریافت ہوا تھا، جوڈتھ ریور فارمیشن ایک ایسا قدیم ترین ارضیاتی علاقہ ہے جو ڈائناسارز کے ڈھانچوں کے لیے مشہور ہے۔
