میاں چنوں : بااثر افراد نے بجلی کا کنکشن کاٹنے کیلئے آنے والے واپڈا ملازمین کو بہیمانہ تشدد کانشانہ بنایا، ایک ملازم کو تشویشناک حالت میں اسپتال میں داخل کرادیا گیا۔
تفصیلات کے مطابق پنجاب کے شہر میاں چنوں میں ریکوری اور بجلی چوری کیخلاف کارروائی کیلئے جانے وا لے واپڈ لائن سپرنٹنڈنٹ کلیم اوران کے ساتھیوں کو متعدد افراد نے مار مار کر شدید زخمی کردیا۔
مذکورہ ملازمین کو ایک شخص کے ڈیرے پر لے جاکر رسیوں سے باندھ کر بری طرح پیٹا گیا، واپڈا چیئرمین شرافت نے میڈیا کو بتایا کہ واپڈا ملازمین واجبات کی عدم ادائیگی پر بجلی کا کنکشن منقطع کرنے گئے تھے
انہوں نے کہا کہ عتیق اور شفیق نے اپنے ملازمین کے ساتھ مل کر واپڈا اہلکاروں پر بہیمانہ تشدد کیا، تشدد سے زخمی ہونے والے واپڈ لائن سپرنٹنڈنٹ کلیم کی حالت تشویشناک ہے جنہیں ملتان نشتراسپتال منتقل کردیا گیا ہے۔
دوسری جانب واپڈا ملازمین نے اپنے ساتھی ورکروں پر تشدد کے خلاف کام چھوڑ ہڑتال کر دی اور واپڈا ملازمین نے تشدد میں ملوث ملزمان کو گرفتار کرکے کیفرکردار تک پہنچانے کا مطالبہ کیا ان کا کہنا ہے کہ ملزمان کی گرفتاری تک احتجاج جاری رکھیں گے۔
