سڈنی : آسٹریلیا میں ایک خاتون کو اس وقت حیرت اور خوف کا سامنا کرنا پڑا جب اس نے تقریباً ایک ماہ بعد اپنی کار کا دروازہ کھولا۔
اپنی نئی کار کی یہ حالت دیکھ کر اس کے اوسان خطا ہوگئے اور وہ ہکا بکا رہ گئی کہ بند گاڑی کے اندر ایسا کیسے ہوسکتا ہے؟
آسٹریلیا کے شہر سڈنی سے تعلق رکھنے والی31 سالہ جیس ڈیوس نے ٹِک ٹاک پر ایک خوفناک ویڈیو پوسٹ کی ہے جسے دیکھ کر صآرفین بھی حیرت زدہ رہ گئے۔
ہوا کچھ یوں کہ گھر کے باہر تقریباً ایک ماہ سے کھڑی بند گاڑی میں پھپھوندی لگ گئی گاڑی کی سیٹیں، اسٹیئرنگ اور ہینڈ بریک تک اس بدبودار پھپھوندی سے بھرا ہوا تھا۔
خاتون نے میڈیا سے گفتگو کرتے ہوئے بتایا کہ میں اپنی کار میں ایک انتہائی بدبودار اور گھناؤنا منظر دیکھ رہی ہوں اور مجھے یہ بھی نہیں معلوم کہ آگے کیا کرنا ہے۔”
جیس ڈیوس کے مطابق اس کے پارٹنر ٹائسن ہوفمین نے کار کو اس حالت میں دیکھا تو مجھے اطلاع دی۔ میں توقع کر رہی تھی کہ شاید وہاں سانپ یا کسی قسم کا جانور ہے یا کچھ اور۔
آخر کار جب میں نے نیچے آکر دیکھا کہ وہاں کیا ہے میں حیران رہ گئی، میں نے اس سے پہلے ایسا منظر کبھی نہیں دیکھا نہ سنا۔
اس کے بعد ٹائسن نے چہرے پر ماسک لگایا اور پھپھوندی کو اتنا صاف کیا جتنا وہ کرسکتا تھا لیکن پھر بھی اس کی بدبو ختم نہ ہوئی جو کافی دیر تک آتی رہی۔
واضح رہے کہ پھپھوندی وہ سفید بالیدگی ہے جو کپڑوں اور دیگر اشیاء پر اس وقت پیدا ہوتی ہے جب درجہ حرارت بلند اور فضا میں نمی زیادہ ہو۔
پھپھوندی کے سبب کپڑوں اور دیگر اشیاء کا رنگ اڑجاتا ہے، ان میں سے ایک عجیب سی ناگوار بو آنے لگتی ہے اور اس بات کا امکان بھی رہتا ہے کہ کپڑا گل جائے گا۔
