نیویارک: نیویارک میں صبح ہوتے ہی شہر کے مختلف علاقوں میں مختلف کارٹون کریکٹرز کی شہزادیاں سڑکوں پر آتی ہیں اور جہاں کہیں انہیں کوئی روتا ہوا بچہ نظر آتا ہے اسے ہنسانے کی کوشش کرتی ہیں۔
یہ ’شہزادیاں‘ دراصل 5 خواتین ہیں جنہیں کارٹون فلموں میں دکھائی جانے والی شہزادیوں جیسا روپ دھارنے کا شوق تھا اور اپنے اس شوق کو انہوں نے کام میں بدل دیا۔
یہ کام اب وہ 60 سے 80 ڈالر فی گھنٹہ کے عوض کرتی ہیں۔ ایک فوٹوگرافر برائن شموے نے ان شہزادیوں کی سڑک پر گزاری جانے والی زندگی کو عکس بند کیا ہے۔
ایک ادارے نے ان شہزادیوں سے انٹرویو کیا اور جاننے کی کوشش کی کہ انہوں نے اس کام کو بطور کیریئر کیوں چنا۔ ’دا پرنسز اینڈ دی فراگ‘ کی شہزادی جسے ’فراگ پرنسز‘ کہا جاتا ہے نے اس بارے میں بتایا، ’میں ایک ایسی چھوٹی بچی کی برتھ ڈے پارٹی میں گئی جس نے کچھ روز قبل ہی یہ کارٹون فلم دیکھی تھی اور وہ روز یہ خواہش کرتی تھی کہ فراگ پرنسز اس سے ملنے آجائے۔ جب میں اس کی پارٹی میں پہنچی تو وہ مجھے دیکھ کر پاگل ہوگئی‘۔
فراگ پرنسز نے بتایا، ’ہر پارٹی میں ایک ایسا بچہ ضرور ہوتا ہے جو مجھ سے ایسا سلوک کرتا ہے کہ میں اصل شہزادی نہیں ہوں۔ لیکن مجموعی طور پر بچے مجھے دیکھ کر بہت خوش اور پرجوش ہوتے ہیں اور مجھے یہ اچھا لگتا ہے‘۔
فوٹوگرافر برائن شموے نے ان شہزدایوں کی خوبصورت تصاویر ایک پروجیکٹ کے تحت کھینچی ہیں اور ان تصاویر کو بہت پسند کیا جارہا ہے۔
