کراچی : شہر قائد کے ساحلی علاقے دو دریا سے ملنے والی نعش کی شناخت ہوگئی، لیفٹیننٹ جنرل ریٹائرڈ مظفر حسین عثمانی کی موت ہارٹ اٹیک سے ہوئی۔
کراچی کے علاقے دو دریا کے قریب گاڑی سے ملنے والی لاش کی شناخت ہوگئی ہے، شناخت لیفٹیننٹ جنرل ریٹائرڈ مظفر حسین عثمانی کے نام سے ہوئی۔
اس حوالے سے پولیس حکام کا کہنا ہے کہ گاڑی چلاتے ہوئے ہارٹ اٹیک ہواجس سے ان کی موت واقع ہوئی، گاڑی کو تحویل میں لے کر لاش کو پی این ایس شفا اسپتال منتقل کردیا گیا ہے۔
واضح رہے کہ لیفٹیننٹ جنرل ریٹائرڈ مظفر حسین عثمانی جنرل مشرف دور میں ڈپٹی چیف آف آرمی اسٹاف تھے۔
لیفٹنٹ جنرل (ریٹائرڈ) مظفرحسین عثمانی پاک فوج کے ایک باصلاحیت افسر تھے جو کراچی کے کور کمانڈر اور ڈپٹی چیف آف آرمی اسٹاف کے عہدوں پر فائز رہے۔
آپ 1944 میں مراد آباد بھارت میں ایک سنّی متوسط گھرانے میں پیدا ہوئے، آپ مفتی اعظم پاکستان تقی عثمانی کے عزیز تھے، آپ نے تین سال کی عمر میں اپنے گھر والوں کے ساتھ 1947 میں پاکستان ہجرت کی۔
پیشہ ورانہ زندگی
1966میں آپ نے پی ایم اے 36 میں کامیاب ہوکر پاک فوج کی فرنٹیر فورس رجمنٹ میں آرمڈ بٹالین میں شمولیت اختیار کی۔ آپ نے کمانڈ اینڈ اسٹاف کالج کوئٹہ سے گریجویشن کیا۔
اس کے علاوہ رائل کالج آف ڈیفینس برطانیہ سے تعلیم حاصل کی، کچھ عرصہ آپ سعودی عرب میں بھی تعینات رہے آپ کے لیفٹیٹنٹ جنرل کے عہدے پر ترقی پانے کے بعد پاک فوج کی دو کورز کراچی اور بہاولپور آپ کے زیرکمان رہیں۔ بعد میں آپ کو ڈپٹی چیف آف آرمی اسٹاف بنادیا گيا جس سے آپ 2002 میں ریٹائرڈ ہوئے۔
