لندن : برطانیہ میں ایک سفاک مالکن نے اپنے کتے کو واش روم میں بند کرکے لاوارث چھوڑ دیا، دو ماہ تک کتا کیسے زندہ رہا حقیقت جان کر دیکھنے والے حیرت زدہ رہ گئے۔عدالت نے مالکن کو سزا سنادی۔
لندن کے علاقے میں ایک لڑکی نے اپنا گھر تبدیل کیا تو اپنے کتے کو پرانے گھر میں ہی باندھ کر لاوارث چھوڑ گئی، جو دو ماہ تک ایک ایسی چیز پر زندہ رہا کہ دیکھنے والے حیران رہ گئے۔
غیرملکی خبر رساں ادارے کے مطابق رائل سوسائٹی فار دی پریوینشن آف کروئیلٹی ٹو اینیملز (آر ایس پی سی اے) نامی مقامی تنظیم کے رضا کاروں نے دو ماہ بعد جب اس کتے کو ریسکیو کیا تو وہ محض ہڈیوں کا ڈھانچہ بن چکا تھا۔ اس لاچار کتے کو دیکھ کر لگتا تھا کہ جیسے ہڈیوں کا کوئی ڈھانچہ حرکت کررہا ہو۔
ذرائع کے مطابق اس کتے کو اس کی سفاک مالکن باتھ روم میں باندھ گئی تھی جہاں تنظیم کے لوگوں کا کہنا ہے کہ یہ کتا ٹوتھ پیسٹ کھا کر اور ٹوائلٹ باﺅل سے پانی پی کر دو ماہ تک زندہ رہا۔ ریسکیو کرنے کے بعد اسے فوری طور پر جانوروں کے اسپتال منتقل کیا گیا جہاں اس کا علاج کیا گیا۔
اس حوالے سے آر ایس پی سی اے انسپکٹر ریچل لیفی کا کہنا ہے کہ یہ کتا اپنے جسم کے فطری وزن کا دو تہائی کھو چکا تھا۔ آج تک میں نے اتنا سوکھا اور کمزور کتا نہیں دیکھا جو اس حالت میں بھی زندہ ہو۔
میڈیا رپورٹ کے مطابق پولیس نے اس کتے کی 23سالہ مالکن آئلہ گلکرسٹ کو تلاش کرکے گرفتار کرکے عدالت میں پیش کیا، جہاں اسے12ماہ کے لیے نوکری سے معطل 8ہفتے قید اور 400پاﺅنڈ جرمانے کی سزا سنا دی گئی ہے۔
