شدید گرمی کے باعث کتے بھی بوکھلا گئے، ایک ماہ کے دوران کتوں نے 16 ہزار سے زائد افراد کو کاٹ لیا۔
برصغیر کے خطے میں اس وقت موسم گرما اپنے جوبن پر ہے، ایسے میں بھارت کے کئی شہروں میں بھی شدید گرمی پڑ رہی ہے۔ تاہم اس گرمی نے بھارت میں کتوں کو پاگل کردیا ہے انھوں نے انسانوں پر حملے شروع کردیے ہیں۔
پریاگ راج میں گزشتہ دنوں 138 سالوں کا گرمی کا ریکارڈ ٹوٹ گیا جبکہ درجہ حرارت 48.8 ڈگری تک جا پہنچا۔ شہر میں کتوں کے کاٹنے کے واقعات بہیت بڑھ گئے ہیں جبکہ اینٹی ریبیز کے انجکشن بھی کم پڑنے لگے ہیں۔
نیشنل اینٹی ریبیز کنٹرول پروگرام کے مطابق پریاگ راج میں مئی میں 16 ہزار سے زائد افراد کو کتوں نے کاٹ لیا ہے۔ یعنی کہ شہر میں روزانہ 500 سے زائد لوگوں کو کتے کاٹ رہے ہیں جبکہ اپریل 2024 میں ہی 12333 لوگوں کو کتوں نے اپنا نشانہ بنایا۔
گزشتہ سال 24-2023 میں ایک لاکھ 42 ہزار 80 لوگوں کو کتوں نے کاٹا، ان میں سے 3832 پالتو اور 8501 آوارہ کتے تھے۔
دراصل کتوں کے رویہ میں موسم کا اثر بہت تیزی سے پڑتا ہے۔ ماہرین کے مطابق زیادہ سردی و گرمی، برسات اور لو کا موسم کتوں کے رویے کو متاثر کرتا ہے۔ سردی کے وقت کتے مایوس رہتے ہیں لیکن گرمی آتے ہی جارحانہ ہو جاتے ہیں۔
ڈاکٹر ورون کواترا کا کہنا ہے کہ گرمیوں کے دنوں میں کتوں میں کورٹیسول ہارمون تیزی سے بڑھتا ہے۔ یہ کشیدگی پیدا کرنے والا ہارمون ہے جس کے باعث کتے غیر معمولی رویہ اپناتے ہیں۔ شہر میں 96 فیصد کتے کاٹنے کے کیسز اسٹریٹ ڈاگس کے ہی ہیں۔
خیال رہے کہ بھارت میں گرمی نے پچھلے تمام ریکارڈ توڑ دیے ہیں اور دہلی، یوپی، بہار، راجستھان اور پنجاب جیسی ریاستوں میں درجہ حرارت پچھلے سال سے بھی کہیں زیادہ ہے۔
