پاکستانی ٹرک آرٹ کی شہرت پاکستانی حدود کو پار کر کے دیگر ممالک تک بھی جا پہنچی۔ 2 مشہور بین الاقوامی برانڈز نے اپنی نئی مصنوعات کو ٹرک آرٹ کی طرز پر پیش کردیا۔
معروف اطالوی مینو فیکچرر کمپنی سمیگ نے کچن مشینری کی نئی رینج کو پاکستانی ٹرک آرٹ سے مماثلت رکھنے والے رنگوں میں ڈھال کر پیش کیا۔
اس ڈیزائن کو متعارف کروانے کا سہرا معروف فیشن کمپنی ڈولچے اینڈ گبانا کے سر ہے اور دونوں برانڈز نے مشترکہ تعاون سے یہ خوبصورت مشینری پیش کی ہے۔
گو کہ ڈولچے اینڈ گبانا کا کہنا ہے کہ یہ آرٹ اطالوی شہر سسلی کا روایتی آرٹ ہے اور تصاویر میں پیش کیے جانے والے مناظر بھی وہیں کے ہیں، تاہم اس میں دنیا بھر میں مشہور ہوجانے والے پاکستانی ٹرک آرٹ کی آمیزش اور اس سے مماثلت کا عنصر نظر انداز نہیں کیا جاسکتا۔
#DGSICILYISMYLOVE is the combination of Dolce&Gabbana and Smeg’s creative forces. #DGSMEG pic.twitter.com/D68GH20sMh
— Dolce & Gabbana (@dolcegabbana) April 4, 2017
جاری کیے جانے والے نہایت رنگا رنگ اور خوبصورت ٹوسٹر، کافی مشین، جوسر اور بلینڈر وغیرہ نے فوراً ہی لوگوں کی توجہ اپنی طرف مبذول کروالی ہے۔
یہ پہلی بار نہیں ہے کہ جب ڈولچے اینڈ گبانا نے اس قدر خوش رنگ مصنوعات کو پیش کیا ہے۔ اس سے پہلے بھی ایک نمائش میں یہ برانڈ پاکستانی ٹرک آرٹ سے مشابہہ ایک رنگین ٹرک میں اپنی میک اپ مصنوعات پیش کرچکا ہے۔
#DGBeautyOnTheGo arrived in Milan! First stop in Corso Buenos Aires, 4 – from 11am till 8pm. #dgbeauty #milan pic.twitter.com/mjiMAorUpa
— Dolce & Gabbana (@dolcegabbana) May 16, 2015
یاد رہے کہ پاکستانی ٹرکوں پر بنائی جانے والی خوش رنگ تصاویر اور رنگوں سے ڈھلے الفاظ و اشعار کو اب ٹرک آرٹ کے نام سے جانا جاتا ہے۔
مزید پڑھیں: پاکستانی ٹرک پر کینیڈا کے وزیر اعظم کی تصویر
مختلف پاکستانی فنکاروں نے اس آرٹ میں مزید نکھار پیش کر کے اسے دنیا بھر میں پیش کیا جس کے بعد اب یہ دنیا بھر میں پاکستانی ٹرک آرٹ کے نام سے جانا جاتا ہے۔
