اوکاڑہ : پنجاب کے شہر اوکاڑہ کے قریب ایک گاؤں جسے گڑیاؤں کا گاؤں بھی کہا جاتا ہے یہ جگہ خواتین کی ہنرمندی اور منفرد روایتوں کی وجہ سے بھی کافی مشہور ہے۔
اس گاؤں کا اصل نام”ٹھٹھہ غلام کا” ہے جبکہ اس کا دوسرا نام ” ڈول ولیج آف پاکستان ” ہے کیونکہ یہاں کی ہنر مند خواتین اپنے ہاتھوں سے نہایت خوبصورت اور دیدہ زیب گڑیاں تیار کرتی ہیں۔
دوسروں کی نظر میں فالتو اشیاء بھی اُن کے لیے کار آمد ہوتی ہیں، کپڑوں کے چھوٹے چھوٹے ٹکڑوں کو جس نفاست سے جوڑتی ہیں ،اُنہیں دیکھ کر یقین نہیں آتا کہ یہ گھریلو خواتین کی ہنر کاری کا منہ بولتا ثبوت ہے۔
اس گاؤں کو ڈول ویلج آف پاکستان اس لیے بھی کہا جاتا ہے کہ اس گاؤں کی شہرت کی اہم وجہ یہاں تیار کی جانے والی گڑیاں ہیں۔ زیادہ تر خواتین صبح کھیتوں میں کام کرتیں اور شام کو گڑیاں بناتی ہیں۔
یہ گڑیائیں پاکستان کے ہر شہر کی ثقافت کو اُجاگر کرتی ہیں۔ اس کے علاوہ یہاں ہاتھوں سے بنی سو سے زائد دیگر مصنوعات بھی ہیں۔
