کراچی: غیر ملکی کرنسی کی ذخیرہ اندوزی کے خلاف جاری حکومتی کریک ڈاؤن کے نتیجے میں روپے کے مقابلے میں امریکی ڈالر کی بے قدری کا سلسلہ برقرار ہے۔
آج انٹر بینک میں روپے کے مقابلے میں ڈالر 1.05 روپے سستا ہو کر 294 روپے 90 پیسے پر بند ہوگیا۔ گزشتہ روز انٹر بینک میں ڈالر 295 روپے 95 پیسے پر بند ہوا تھا۔
یاد رہے کہ کریک ڈاؤن سے اب تک اوپن مارکیٹ میں ڈالر تقریباً 31 روپے سستا ہو چکا ہے۔ یکم ستمبر کو ڈالر 328 روپے کی بلند ترین سطح پر بند ہوا تھا۔
Interbank closing #ExchangeRate for today https://t.co/F9zIthpsBr#SBPExchangeRate pic.twitter.com/cxseTCqdgS
— SBP (@StateBank_Pak) September 19, 2023
دوسری جانب وفاقی تحقیقاتی ادارے (ایف آئی اے) اور حساس ادارے نے ڈالر ذخیرہ کرنے والوں کے گھروں کی نشاندہی کرتے ہوئے ٹارگٹڈ چھاپوں کی تیاری کر لی ہے۔
ذرائع کے مطابق ڈالرزکی برآمدگی کیلیے ایف آئی اے اور حساس ادارے گھروں پر چھاپے ماریں گے، ایکسچینج کمپنیز سے حاصل ڈیٹا کی مدد سے گھروں کی نشاندہی کر لی گئی، مستند اطلاعات ہیں کہ کریک ڈاؤن کے بعد مافیا نے گھروں میں ڈالر ذخیرہ کر رکھے ہیں۔
اداروں کے پاس غیر معمولی تعداد میں ڈالر لینے والوں کی بھی فہرست بھی موجود ہے۔ ایف آئی اے اور حساس ادارے گھروں پر ٹارگٹڈ چھاپہ مار کارروائی کریں گے۔
