کراچی: امریکی ڈالر کی قیمت میں اچانک کمی کے بعد ایک بار پھر اس کی قدر میں اضافہ دیکھا جارہا ہے، بدھ کے روز ڈالر کی قیمت 220 روپے پر پہنچ گئی۔
تفصیلات کے مطابق کاروباری ہفتے کے تیسرے روز 19 اکتوبر 2022 بدھ کو انٹر بینک مارکیٹ میں ڈالر کی قیمت میں اضافہ دیکھا گیا۔
ابتدا میں انٹر بینک مارکیٹ میں ڈالر 1 روپے 29 پیسے مہنگا ہونے کے بعد 221 روپے کا ہوگیا۔
دن کے اختتام تک انٹر بینک مارکیٹ میں ڈالر کی مجموعی قیمت میں 1 روپے 17 پیسے روپے اضافہ ہوا جس کے بعد ڈالر 220 روپے 88 پیسے پر بند ہوا۔
فاریکس ڈیلرز کا کہنا ہے کہ بینک 221 روپے 35 پیسے میں ڈالر فروخت کر رہے ہیں جبکہ اوپن مارکیٹ میں ڈالر 226 سے 229 روپے میں فروخت ہو رہا ہے۔
خیال رہے کہ ڈالر کی قیمت میں کمی وزیر خزانہ اسحاق ڈار کے وزارت کا چارج سنبھالنے کے بعد دیکھی جارہی تھی۔
وزرات خزانہ کی سٹے بازی پر کڑی نگاہ رکھنے اور ہر قسم کے زرمبادلہ کے لین کی مانیٹرنگ کے باعث زرمبادلہ کی دونوں مارکیٹوں میں بلا جواز ڈالر کی خریداری سرگرمیاں منجمد ہوگئیں۔
تاہم اب ڈالر کی قیمت میں ایک بار پھر بتدریج اضافہ ہونا شروع ہوگیا ہے۔
بینکوں کی ناجائز منافع خوری
دوسری جانب ذرائع وزارت خزانہ کا کہنا ہے کہ گزشتہ چند ماہ میں ڈالر کی قیمت میں اضافے کے دوران نجی بینکوں نے خوب فائدہ اٹھایا، نجی بینکس نے اس دوران 56 ارب روپے کا منافع کمایا۔
ذرائع کا کہنا ہے کہ ڈالر کی قیمت میں اضافے پر اسٹیٹ بینک نے نجی بینکوں سے تحقیقات کا فیصلہ کیا ہے۔
اسٹیٹ بینک نے 8 نجی بینکوں کو نوٹسز بھی جاری کردیے ہیں، اسٹیٹ بینک کی تحقیقاتی رپورٹ جلد مکمل ہوجائے گی جو وزیر خزانہ اسحاق ڈار کو پیش کی جائے گی۔
