لاہور: مری میں بڑھتے ہوئے جرائم اور سیاحوں کے ساتھ بدسلوکی کے واقعات کے بعد پنجاب حکومت نے ڈولفن فورس تعینات کردی۔
تفصیلات کے مطابق اتوار کو وزیراعلیٰ پنجاب عثمان بزدار کی ہدایت پر ڈولفن فورس کو تعینات کیا گیا، ڈولفن فورس ناصرف سیاحوں اور شہریوں کو تحفظ فراہم کرے گی، بلکہ ٹریفک کے نظام کو بہتر بنانے میں بھی معاون ثابت ہوگی۔
تعنیاتی کے فوری بعد ڈولفن فورس کے اہلکاروں نے مری میں گشت بھی شروع کردیا۔ واضح رہے کہ پنجاب حکومت کی جانب سے یہ اقدام سیاحوں پر حالیہ تشدد کے بعد اٹھایا گیا۔
گذشتہ سال مری میں ہوٹل مالکان کی طرف سے سیاحوں کے ساتھ بدسلوکی کے متعدد واقعات رونما ہوئے تھے۔ تشدد کے بڑھتے ہوئے واقعات کے بعد سیاحوں کی جانب سے مری کے بائیکاٹ کی مہم بھی چلائی گئی۔
ان واقعات میں سوشل میڈیا پر خواتین سیاحوں پر بھی تشدد کی ویڈیوز سامنے آئی تھیں۔ تاہم ڈولفن فورس کی تعنیاتی سے اب مری میں سیاحت کے فروغ میں مدد مل سکے گی۔
مری میں پہلی برفباری، سیاحوں نے ملکہ کوہسار کا رخ کرلیا
وزیراعلیٰ پنجاب کے مطابق سیاحوں کی شکایات پر فوری کارروائی کی جائے گی۔
یاد رہے کہ رواں سال کے آغاز میں سیاحوں پر تشدد کی ویڈیو وائرل ہوئی تھی، مری کے مقام پر متعدد نامعلوم افراد نے گاڑی میں بیٹھی فیلمی پر دھاوا بول دیا تھا۔
