دنیا بھر کے بچوں اور بڑوں کا پسندیدہ کارٹون کریکٹر ڈونلڈ ڈک آج اپنی 84 ویں سالگرہ منا رہا ہے، ڈونلڈ ڈک اپنی مخصوص آواز کے سبب منفرد کردار ہے۔
مشہور زمانہ کارٹون ’ڈانلڈ ڈک‘ کارٹون بنانے والی پہلی کمپنی والٹ ڈزنی کا کردار ہے اور اس کمپنی عالمی شہرت یافتہ کارٹون کریکٹرز گوفی، مکی ماؤس، منی ماؤس اور پلوٹو کی طرح دنیا بھر کے بچے اور بڑے ڈونلڈ ڈک کے دیوانے ہیں۔
ڈونلڈ ڈک ایک ملاح ہے جو ہر وقت غصے میں رہتا ہے ، سر پر ملاحوں کی مخصوص کیپ لگائے اپنے دوست مکی ماؤس کے ساتھ ہمہ وقت پر مزاح حرکات میں مشغول رہتا ہے۔ مکی ماؤس کی فلموں میں سب سے زیادہ آنے والا دوسرا کردار ڈونلڈ ڈک ہی ہے۔
والٹ ڈزنی کے اس مشہور کا رٹون کی پہلی فلم’وائز لٹل ہین‘ آج سے 84 سال قبل 1934 میں پیش کی گئی تھی۔ اُس وقت سے لے کر آ ج تک ڈو نلڈ ڈک اپنےمداحوں میں مشہور ہے جبکہ مکی ماؤس اس کے اچھے دو ستوں میں شامل ہے۔
اپنی پہلی ریلیز سے آج تک ڈونلڈ ٹرمپ انتہائی مقبول ترین کارٹون کردار ہے ، اوراپنی مقبو لیت کے با عث ڈونلڈ ڈک کا شمار ہردور کے 50 عظیم ترین کا رٹون کرداروں میں بھی کیا جا تاہے۔
خاص بات یہ ہے کہ ڈونلڈ ڈک کی سالگرہ تو آج منائی جارہی ہے لیکن ڈونلڈ ڈک اس سے پہلے بھی ایک اسٹوری بک ’دی ایڈونچر آف مکی ماؤس‘ میں جلوہ گر ہوچکا ہے ، لیکن اس وقت اس کی ہیت موجودہ ڈونلڈ ڈک والی نہیں تھی اور نہ ہی وہ ملاح تھا بلکہ ایک عام بطخ تھا، لہذا 1934 میں فلم ریلیز کو ہی ڈونلڈ ڈک کی تاریخ رونمائی یا سالگرہ سمجھا جاتا ہے۔
یہاں آپ کو یہ بھی بتادیں کہ ڈونلڈ کا کردار کس طرح تراشا گیا۔ والٹ ڈزنی ہی اس کردار کے خالق ہیں اور انہوں نے کلیئرنس ناش نامی ایک وائس آرٹسٹ کو انتہائی منفرد آواز میں ’ میری ہیڈ اے لٹل لیمب‘ گاتے سنا، ناش کا خیال تھا کہ وہ ایک بھیڑ کی آواز نکال رہے ہیں لیکن ڈزنی نے زور دیا کہ یہ آواز کسی بطخ کے کردار کے ساتھ زیادہ لوگوں کو اپنی جانب متوجہ کرے گی۔
کلیئرنس ناش کو اسی وقت ملازمت پر رکھ لیا گیااور اس کے بعد ڈزنی نے اپنے ذور تخیل سے ڈونلڈ کے کردار کو تراشا، سجایا ، سنوارا اور دنیا کے سامنے پیش کردیا۔
ڈونلڈ کے کردار کی شناخت اس کے دو رویے ہیں ، ایک تنک مزاج ہونا اور بات بات پر سیخ پا ہوجانا اور دوسری جانب ڈونلڈ کا زندگی کے لیے انتہائی عمومی رویہ اختیار کیے رکھنا، اسے ایک منفرد کردار میں ڈھالتا ہے۔
