شادی کا بندھن صرف لڑکے اور لڑکی کے تعلق کا ہی نام نہیں بلکہ یہ رشتہ دو خاندانوں کے درمیان نئے تعلق کو جنم دیتا ہے۔
دُنیا کے ہرخطے میں شادی کے موقع پر مخصوص رسم و رواج کو پورا کرنے کا خاص طور پر اہتمام کیا جاتا ہے اگر کسی بھی خطے میں ہونے والی شادی میں ان رسومات کو پورا نہ کیا جائے تو شادی کو ادھورا سمجھا جاتا ہے۔
ان ہی رسومات میں جہیز بھی خاص اہمیت کا حامل ہے ہمارے معاشرے میں ویسے تو سب لوگ جہیز کو معیوب کہتے ہیں لیکن عملی طور پر اسے مانگنا یا لینا برا نہیں سمجھتے۔
اس حوالے سے اے آر وائی نیوز کے پروگرام باخبر سویرا میں رشتے کروانے والی خاتون (میچ میکر) شازیہ رحمان نے شرکت کی اور جہیز سے متعلق رشتوں میں پیدا ہونے والی پیچیدگیوں کے بارے میں ناظرین کو آگاہ کیا۔
انہوں نے کہا کہ جہیز لینے اور دینے کے بارے میں جیسے پہلے سوچا جاتا تھا آج بھی وہی صورتحال ہے بس فرق صرف اتنا ہے کہ طریقہ واردات بدل گیا ہے، یعنی جہیز مانگنے کا انداز نیا اپنا لیا گیا ہے۔
انہوں نے کہا کہ اس معاملے میں امیر ہو یا غریب سب ہی اس بہتی گنگا میں ہاتھ دھو رہے ہیں اور کسی نہ کسی بہانے سے اپنی بات دوسرے کے کانوں تک پہنچا دیتے ہیں۔
شازیہ رحمان نے بتایا کہ صرف لڑکے والے نہیں بلکہ لڑکی والے بھی اپنی شرائط رکھتے ہیں کہ ہماری لڑکی جوائنٹ فیملی میں نہیں رہے گی یا ہنی مون منانے کہاں لے کر جائیںگے۔
اس موقع پر اسلامی نظریاتی کونسل کے سینئر ریسرچر مفتی غلام ماجد نے جہیز کی لعنت کے حوالے سے شرعی اور آئینی قوانین پر روشنی ڈالی۔
انہوں نے بتایا کہ جہیز کا قانون 1976 میں بنایا گیا اس قانون میں تین موضوعات بیان کیے ہیں پہلا جہیز دوسرا دلہن کے تحائف و ملبوسات اور تیسرا شادی کے مجموعی اخراجات، جس کیلئے چند ہزار روپے مختص کیے گئے ہیں۔
اس قانون کو تمام فریقین نے پسند کیا لیکن بد قسمتی سے اس پر عمل درآمد کوئی نہیں کرتا، انہوں نے کہا کہ امیر طبقہ اگر اپنے بچوں کی اس طرح سادگی سے شادیاں کرے تو ممکن ہے کہ اس عمل سے معاشرے میں شادیاں کرنا آسان ہوجائے گا، بصورت دیگر یہ مسئلہ حل نہیں ہو پائے گا۔
