ڈاکٹر عاصم لندن روانگی کے لیے تیار -
The news is by your side.

Advertisement

ڈاکٹر عاصم لندن روانگی کے لیے تیار

کراچی: سابق مشیر پیٹرولیم ڈاکٹر عاصم حسین نے بیرون ملک جانے کے لیے ٹکٹ بک کروا لیا۔ عدالت میں ٹکٹ اور طبی معائنے کی تفصیلات بھی جمع کروا دیں۔ نیب نے عدالت سے ڈاکٹر عاصم کی درخواست مسترد کرنے کی استدعا کردی۔

تفصیلات کے مطابق پیپلز پارٹی کے رکن اور سابق مشیر پیٹرولیم ڈاکٹر عاصم حسین نے لندن روانگی کے لیے ٹکٹ بک کروالیا جسے سندھ ہائی کورٹ میں جمع کروا دیا گیا۔

ٹکٹ کے ساتھ انہوں نے اپنے علاج کی تفصیلات بھی عدالت میں جمع کروائیں جس میں ان کی جانب سے کہا گیا کہ علاج کے لیے بیرون ملک نہ گیا تو مفلوج ہوجاؤں گا۔

عدالت میں جمع کروائے گئے قومی ایئر لائن کے ٹکٹ کے مطابق ڈاکٹر عاصم اپنی اہلیہ کے ساتھ 7 مئی کو لندن روانہ ہوں گے اور 15 دن کے قیام کے بعد 21 مئی کو وطن واپس آجائیں گے۔

مزید پڑھیں: ڈاکٹر عاصم حسین 19 ماہ بعد رہا

سندھ ہائیکورٹ میں عدالتی حکم نامے میں ترمیم اور پاسپورٹ واپسی سے متعلق درخواست کی سماعت میں وکیل لطیف کھوسہ نے عدالت کو بتایا کہ ڈاکٹر عاصم نے طبی معائنے کے لیے لندن کے ڈاکٹر سے 4، 5 اور 12 مئی کا وقت لے رکھا ہے۔

وکیل کے مطابق معائنے کے بعد ڈاکٹر عاصم 21 مئی کو وطن واپس آجائیں گے۔

دوسری جانب نیب نے بھی ڈاکٹر عاصم کی درخواست سے متعلق جواب جمع کروا دیا۔ نیب نے مؤقف اختیار کیا کہ ملزم کے خلاف کرپشن کے 2 ریفرنسز زیر التوا ہیں۔ ملزم کے فرار ہونے کا خدشہ ہے۔

نیب نے عدالت سے ڈاکٹر عاصم کی درخواست کو مسترد کرنے کی استدعا بھی کی۔

یاد رہے کہ دہشت گردوں کے علاج سے متعلق کیس میں ڈاکٹر عاصم، میئر کراچی وسیم اختر، رؤف صدیقی، قادر پٹیل، سلیم شہزاد و دیگر نامزد ہیں۔

ڈاکٹر عاصم حسین پر اربوں روہے کی کرپشن کا مقدمہ بھی دائر ہے تاہم اس مقدمے میں 29 مارچ کو ان کی ضمانت منظور کر کے انہیں رہا کردیا گیا تھا۔

بعد ازاں 15 اپریل کو انسداد دہشت گردی کی عدالت نے ڈاکٹر عاصم حسین کو بیرون ملک جانے کی اجازت دینے کا حکم نامہ بھی جاری کردیا تھا جس کے تحت وہ 22 ہفتے کے لیے علاج کی غرض سے بیرون ملک سفر کر سکتے ہیں۔

Comments

comments

یہ بھی پڑھیں