The news is by your side.

Advertisement

ناکامی کے بعد پیپلز پارٹی اور ن لیگ اب مذہب کے نام پر سیاست کررہی ہیں، ڈاکٹر بابر اعوان

اسلام آباد : پاکستان تحریک انصاف کے سینئر رہنما ڈاکٹر بابر اعوان نے کہا ہے کہ پیپلز پارٹی اور ن لیگ ناکامی کے بعد اب مذہب کے نام پر سیاست کررہی ہیں، گزشتہ ادوار کی آڈٹ رپورٹس کو موجودہ دور حکومت سے جوڑا جارہا ہے۔

یہ بات انہوں نے اسلام ۤباد میں میڈیا سے گفتگو کرتے ہوئے کہی۔ ماہر قانون ڈاکٹر بابر اعوان نے کہا کہ کشمیر سے ہمدردی نہ رکھنے والا طبقہ ملک میں افرا تفری چاہتا ہے۔

عوام نے تحریک انصاف کو پانچ سال تک حکمرانی کرنے کا مینڈیٹ دیا ہے، ن لیگ، پی پی ناکامی کے بعد مذہب کے نام پر سیاست کررہی ہیں۔

ایک سوال کے جواب میں انہوں نے کہا کہ اخبارات میں شائع ہونے والی آڈیٹر جنرل کی رپورٹ موجودہ حکومت سے متعلق نہیں ہے، گزشتہ ادوار کی آڈٹ رپورٹس کو موجودہ دور حکومت سے جوڑا جارہا ہے۔

دو سابق وزراء اور پارلیمانی سیکرٹری نے جھوٹی خبروں کا آغاز کیا، آڈیٹر جنرل پاکستان کی رپورٹس گزشتہ حکومت کے سیاہ کارنامے ہیں، جھوٹی خبریں پھیلانے والوں کے خلاف اداروں کو کارروائی کرنی چاہیے۔

ان کا مزید کہنا تھا کہ جھوٹی خبر کی ترویج الیکٹرانک کرائم ہے، جس کی ترویج پر ایف آئی اے کو کارروائی کرنی چاہیے۔ انہوں نے کہا کہ حکومت اسحاق ڈار کی طرح جعلی اعداد و شمار دے کر قوم کو دھوکے میں نہیں رکھے گی۔۔

خسارے میں کمی، درآمدات میں اضافہ بہتر معیشت کے اعشاریے ہیں۔ بابر اعوان نے کہا کہ اسلام آباد لاک ڈاؤن سے متعلق اسلام آباد ہائی کورٹ کا فیصلہ موجود ہے اگر اسلام آباد لاک ڈاؤن کیا جاتا ہے تو یہ ہائیکورٹ کے فیصلے کی توہین ہوگی۔

Comments

comments

یہ بھی پڑھیں