The news is by your side.

Advertisement

ترجمان دفتر خارجہ ڈاکٹر محمد فیصل جرمنی میں پاکستانی سفیر نامزد

اسلام آباد : پاکستان نے 21 ممالک میں سفیروں، ہائی کمشنروں اور قونصل جنرلز کے تبادلے کردیے، ترجمان دفتر خارجہ ڈاکٹر محمد فیصل کو جرمنی میں پاکستانی سفیر نامزد کیا گیا ہے۔

تفصیلات کے مطابق وزارت خارجہ میں اہم تقرریاں و تبادلے کیے گئے ہیں، سینئر افسران کی سفیر اور قونصل جنرل کے عہدے پر تقرری کی گئی ہے۔

دفتر خارجہ کے ذرائع کے مطابق ترجمان دفتر خارجہ ڈاکٹر محمد فیصل کا تبادلہ کرکے انہیں جرمنی میں پاکستانی سفیر نامزد کیا گیا ہے۔

دفتر خارجہ کے ترجمان ڈاکٹر فیصل جو جنوبی ایشیا تعاون تنظیم (سارک) کے ڈائریکٹر جنرل کے عہدے پر بھی کام کر رہے تھے ان کے جرمنی میں تعیناتی کے بعد بتایا جاتا ہے کہ عائشہ فاروقی کو بطور ترجمان دفتر خارجہ تعینات کیے جانے کا امکان ہے۔

دفتر خارجہ کے ذرائع کے مطابق رحیم حیات قریشی ایران میں پاکستان کے سفیر جبکہ شفقت علی خان روس میں پاکستانی سفیر کی ذمہ داریاں ادا کریں گے۔

اس کے علاوہ ایڈیشنل سیکرٹری محمد ندیم خان کو یونان، جرمنی میں سفیر جوہر سلیم کو اٹلی، ڈی جی یورپ ملک محمد فاروق کو پولینڈ، برلن میں موجود مریم مدیحہ آفتاب کو بلغاریہ جب کہ ترکی میں تعینات منسٹر سید علی اسد گیلانی کوازبکستان میں سفیر تعینات کیا گیا ہے۔

دوسری جانب اسٹاک ہوم میں تعینات عرفان احمد کو ترکمانستان میں سفیر تعینات کیا گیا ہے، کینبرا میں تعینات خالد اعجاز کو ارجنٹائن، ڈی جی فارن آفس ڈاکٹر ظفر اقبال رومانیہ، ڈی جی فارن آفس احمد فاروق ڈنمارک اور آذربائیجان میں تعینات جبکہ سفیر ڈاکٹر سعید خان کے عرصہ تعیناتی میں چھ ماہ کی توسیع کرنے کے احکامات جاری کر دیے گئے ہیں۔

دفتر خارجہ نے دو فوجی افسران کو بھی پوسٹنگ دی ہے جس میں سابق ڈی جی رینجرز پنجاب میجر جنرل عمر فاروق برکی کو اردن میں جبکہ وائس ایڈمرل اطہر مختار کو مالدیپ میں سفیر مقرر کیا گیا ہے۔

سردار اظہر طارق خان کو کرغزستان میں سفیر جبکہ زاہد حسین کو فرینکفرٹ میں قونصل جنرل، ثمینہ مہتاب کو قونصل جنرل

شانگڈو اور محمد طارق وزیر کو مانچسٹر میں قونصل جنرل مقرر کر دیا گیا ہے۔
ذرائع کے مطابق وزیر اعظم عمران خان نے مذکورہ فہرست کی باقاعدہ منظوری دے دی ہے اور آئندہ چند ہفتوں میں یہ افسران اپنے عہدوں کا چارج سنبھال لیں گے۔

Comments

یہ بھی پڑھیں