The news is by your side.

Advertisement

ایم کیو ایم کو پارلیمانی کمیٹی میں شامل کیا جائے، ڈاکٹرفاروق ستار

کراچی : ایم کیو ایم کے سینئر رہنما ڈاکٹرفاروق ستار نے کہا ہے کہ ہم متحدہ اپوزیشن کا حصہ نہیں ہیں لیکن اپوزیشن ضرور ہیں، ہمارا اپنامؤقف ہے لہٰذا ہمیں تیرہواں کھلاڑی سمجھ کر حکومت اور اپوزیشن کی مشترکہ پارلیمانی کمیٹی میں شامل کیا جائے۔

تفصیلات کے مطابق ان خیالات کا اظہار انہوں نے کراچی میں پی ایس 106کے ضمنی انتخاب میں الیکشن آفس کے افتتاح کے موقع پر صحافیوں سے بات چیت کرتے ہوئے کیا۔

ڈاکٹر فاروق ستار نے کہا کہ ہم مکمل احتساب کے حامی ہیں، ایم کیوایم پاکستان کو کرپشن سے پاک کرنا چاہتی ہے، ان کا کہنا تھا کہ متحدہ قومی موومنٹ کو نظر انداز نہ کیا جائے ،ہمیں حکومت اور اپوزیشن کی پارلیمانی کمیٹی میں شامل کیا جائے۔

ہم متحدہ اپوزیشن کا حصہ نہیں ہیں لیکن اپوزیشن ضرور ہیں، انہوں نے کہا کہ کسی سیاسی جماعت نے اپنی پارٹی میں احتساب کی بات نہیں کی، ایم کیو ایم اپنے نمائندوں سے گوشواروں کی تفصیلات بھی طلب کرتی ہے۔

ایک سوال کے جواب میں ڈاکٹرفاروق ستار نے کہا کہ میں نجی دورے پر دبئی گیا تھا، میرے جانے پر افواہیں گردش میں تھیں کہ میں نے پارٹی کو چھوڑ دیا ہے، انہوں نے کہا کہ آئندہ بیرون ملک جانے سے قبل میڈیا کے دوستوں کو ضرور آگاہ کروں گا۔

کراچی میں صفائی ستھرائی اور دیگر بلدیاتی مسائل کے حوالے سے ان کا کہنا تھا کہ شہر میں بلدیاتی نمائندوں کو مالی اور انتظامی اختیارات دیئے جائیں اور ٹرانسپورٹ کا نظام وضع کیا جائے تاکہ شہریوں کے مسائل حل ہوں اور وہ سکھ کا سانس لے سکیں۔

 

Comments

comments

یہ بھی پڑھیں