اسلام آباد: حکومت پاکستان نے ڈاکٹر رضا باقر کو گورنر اسٹیٹ بینک تعینات کرنے کا نوٹی فکیشن جار ی کردیا۔
نمائندہ اے آر وائی کے مطابق ڈپٹی سیکریٹری سہیل تالپور کی جانب سے ڈاکٹر باقر کو تین سال کے لیے گورنر اسٹیٹ بینک آف پاکستان تعینات کیے جانے کا نوٹی فکیشن جاری کیا گیا۔
یاد رہے کہ ڈاکٹررضاباقررومانیہ میں آئی ایم ایف کےمشن چیف رہ چکے ہیں جبکہ وہ آئی ایم ایف کی ڈیٹ پالیسی ریویژن کے صدر بھی رہ چکے ہیں۔ دوسری جانب سابق گورنراسٹیٹ بینک طارق باجوہ کااستعفیٰ بھی منظور کرلیا گیا۔
علاوہ ازیں حکومت نے ڈاکٹر مجتبیٰ میمن کو چیئرمین ایف بی آر تعینات کرنے کا فیصلہ کیا جس کا فی الحال کوئی نوٹی فکیشن جاری نہیں کیا گیا۔ ڈاکٹراحمدمجتبیٰ ایڈیشنل سیکریٹری فنانس ڈویژن خدمات انجام دےرہےہیں۔
ڈاکٹر مجتبیٰ میمن کا تعلق پاکستان کسٹمر سروس سے ہے جبکہ انہیں کچھ عرصہ قبل ایڈیشنل سیکریٹری خزانہ بھی تعینات کیا گیا تھا۔
مزید پڑھیں: گورنر اسٹیٹ بینک اور چیئرمین ایف بی آر کون ہوگا؟ مختلف ناموں پر غور شروع
یاد رہے کہ گزشتہ روز حکومت نے معاشی صورتحال کے پیش نظر گورنر اسٹیٹ بینک طارق باجوہ اور چیئرمین ایف بی آر جہانزیب خان کو عہدوں سے ہٹایا تھا جس کے بعد دونوں اہم نشستیں خالی ہوئیں۔
ذرائع کا کہنا تھا کہ وزیراعظم عمران خان دونوں کی کارکردگی سے خوش نہیں تھے اور انہیں ہٹانے کا فیصلہ سابق وفاقی وزیر خزانہ اسد عمر کے دور میں ہوچکا تھا البتہ ناگزیر وجوہات کی بنیاد پر فیصلے میں تاخیر پیش آئی۔
