کراچی : شہر قائد کے سب سے بڑے جناح اسپتال کی ایگزیکٹیو ڈائریکٹر ڈاکٹر سیمی جمالی کینسر کا شکار ہوگئیں، اس بات کا انکشاف انہوں نے اے آر وائی نیوز سے گفتگو کرتے ہوئے کیا۔
تفصیلات کے مطابق جناح پوسٹ گریجویٹ میڈیکل سینٹر کی ایگزیکٹو ڈائریکٹر اور ہر دلعزیز شخصیت ڈاکٹر سیمی جمالی آنتوں کے کینسر میں مبتلا ہوگئیں، ڈاکٹر سیمی جمالی کو آنت کے اسٹیج ٹو کے کینسر کی تشخیص ہوئی ہے۔
اے آر وائی نیوز کے پروگرام الیونتھ آور میں میزبان وسیم بادامی سے گفتگو کرتے ہوئے ڈاکٹر سیمی جمالی نے بتایا کہ مجھے کینسر تشخیص ہوا ہے لیکن اُس کے باوجود کرونا وبا کے دوران اپنی خدمات جاری رکھے ہوئے ہوں اللہ سے دعا ہے کہ وہ ہمیں اس میں کامیابی عطا کرے۔
انہوں نے کہا کہ میری کیمو تھراپی جاری ہے، جس کا پہلا مرحلہ مکمل ہوچکا ہے۔ یاد رہے کہ کینسرکے علاج کے لئے ڈاکٹر سیمی جمالی کی نجی اسپتال میں ایک سرجری ہوچکی ہے۔
“مجھے کینسر تشخیص ہوا ہے لیکن اُس کے باوجود کرونا وباء کے دوران اپنی خدمات جاری رکھے ہوئے ہوں۔۔۔” سلام ہے ڈاکٹر سیمی جمالی آپ کو اور ہر مسیحا کو جس نے اپنی جان کی پرواہ کئے بغیر انسانیت کی خدمت کی۔ آپ کی سلامتی کے لئے ڈھیروں دعائیں https://t.co/U9MR8cTY3g
— Iqrar ul Hassan Syed (@iqrarulhassan) July 21, 2020
ڈاکٹر سیمی جمالی کی بیماری کا سن کر مختلف شعبہ جات کی شخصیات خصوصاً صحافی برادری نے ان کی صحت یابی کیلئے دعا کی ہے، اے آر وائی نیوز کے اینکر پرسن اقرار الحسن اور وسیم بادامی نے سماجی رابطے کی ویب سائٹ ٹوئٹر پر ان کیلئے نیک خواہشات کا اظہار کیا ہے۔
اقرار الحسن کا کہنا ہے کہ سلام ہے ڈاکٹر سیمی جمالی آپ کو اور ہر مسیحا کو جس نے اپنی جان کی پرواہ کئے بغیر انسانیت کی خدمت کی۔ آپ کی سلامتی کے لئے ڈھیروں دعائیں۔
ڈاکٹر سیمی جمالی نے آج پروگرام میں افسوسناک خبر دی کہ وہ کینسر کے مرض میں مبتلا ہوگئی ہیں۔
لوگوں سے دعاےُصحت کی گزارش کی۔۔#11thHour pic.twitter.com/wLhCwI1dtk— Waseem Badami (@WaseemBadami) July 21, 2020
ڈاکٹر سیمی جمالی جناح پوسٹ گریجویٹ میڈیکل سینٹر کی ایگزیکٹو ڈائریکٹر ہیں جنہوں نے اپنے عزم و ہمت، لگن اور محنت سے ایک نمایاں مقام حاصل کیا ہے انہوں نے جناح اسپتال کو بہترین اسپتال بنادیا ہے۔
