اسلام آباد : وزیر اعظم کے معاون خصوصی ڈاکٹر شہباز گل نے کہا ہے کہ آج کی پریس کانفرنس کے بعد ن اور ش کا فرق واضح ہوگیا، ہم نے پہلے ہی اس لڑائی کے بارے میں اگاہ کردیا تھا۔
ن لیگ کی رہنما مریم اورنگزیب کے بیان پر اپنا رد عمل ظاہر کرتے ہوئے ڈاکٹر شہباز گل نے کہا کہ آج کی پریس کانفرنس کے بعد ن اور ش کا فرق واضح ہوگیا ہے۔
انہوں نے کہا کہ پریس کانفرنس سے واضح ہوگیا نااہل لیگ میں بیانیہ نااہل کا ہی چلے گا، یہ پریس کانفرنس دراصل نااہل مریم صفدر کا ن لیگ پر قبضے کا اعلان تھا۔
شہباز گل کا کہنا تھا کہ ہم27جولائی کو بذریعہ ٹوئٹر پیغام چچا اور بھتیجی کی اس لڑائی کی اطلاع دے چکے تھے، چچا بھتیجی میں اقتدار کی لڑائی گھر سے نکل کر میڈیا کی زینت بنی ہے۔
انہوں نے کہا کہ واضح ہوا کہ نااہل لیگ میں گالم گلوچ ،گلو بٹوں کی سیاسی سوچ والے ہی اہل ہوں گے، چوری کے مال پر چوروں میں پھوٹ پڑ چکی ہے، آج ثابت ہوا کہ ن لیگ پر حق صرف نواز شریف اور ان کے بچوں کا ہے۔
