The news is by your side.

Advertisement

بھارتی شہری ڈاکٹر عظمیٰ کو وطن واپسی کی اجازت

اسلام آباد: وفاقی دارالحکومت اسلام آباد ہائیکورٹ نے بھارتی خاتون ڈاکٹر عظمیٰ کو وطن واپس جانے کی اجازت دے دی۔ ان کے شوہر طاہر علی کو ان کا امیگریشن فارم کل عدالت میں جمع کروانے کا حکم دے دیا گیا۔

تفصیلات کے مطابق بھارتی شہری ڈاکٹر عظمیٰ کی پاکستانی شخص طاہر علی سے شادی کے بعد مختلف تنازعوں کی دائر کردہ درخواستوں کی سماعت اسلام آباد ہائیکورٹ میں ہوئی۔

طاہر علی اور ڈاکٹر عظمیٰ اپنے وکلا کے ہمراہ اسلام آباد ہائیکورٹ میں پیش ہوئے۔

دوران سماعت جسٹس محسن اختر کیانی نے کہا کہ طاہر علی سے امیگریشن فارم ملنے پر ڈاکٹر عظمیٰ واپس جا سکتی ہے۔ عظمیٰ کے وکیل کا کہنا تھا کہ عدالت نے عظمیٰ کی بحفاظت واپسی کا حکم دیا ہے۔

مزید پڑھیں: پاکستانی شہری نے گن پوائنٹ پر نکاح کیا: بھارتی خاتون کا الزام

طاہر علی کی درخواست نمٹاتے ہوئے عدالت کا کہنا تھا کہ عظمیٰ اگر چیمبر میں ملاقات کرنا چاہتی ہیں تو کرلیں مگر عظمیٰ نے انکار کردیا۔

عدالت نے عظمیٰ کو بھارت جانے کی اجازت دے دی۔

دوسری جانب پاکستان فارن آفس نے بھی عدالت میں جواب جمع کروا دیا۔ عدالت نے طاہر علی کو امیگریشن فارم جمع کروانے کا حکم دیتے ہوئے سماعت ملتوی کردی۔

یاد رہے کہ ڈاکٹر عظمیٰ اور صوبہ خیبر پختونخواہ کے شہر بونیر کے رہائشی طاہر علی کی دوستی ملائیشیا میں ہوئی تھی جو محبت میں بدل گئی۔ کچھ عرصہ بعد ڈاکٹر عظمیٰ، طاہر سے شادی کرنے کے لیے واہگہ بارڈر سے پاکستان پہنچیں جس کے بعد دونوں کا نکاح انجام پایا۔

دو روز بعد ڈاکٹر عظمیٰ طاہر کے بھارتی ویزے کی درخواست لیے 2 روز بھارتی ہائی کمیشن گئیں جہاں سے وہ منظر سے غائب ہوگئیں۔

تاہم اگلے ہی دن وہ منظر عام پر آگئیں اور انہوں نے اپنا بیان بدلتے ہوئے کہا کہ ان سے گن پوائنٹ پر نکاح کروایا گیا۔

مقامی عدالت میں درخواست دائر کرنے کے بعد انہوں نے مبینہ شوہر پر گن پوانئٹ پر نکاح کے ساتھ ساتھ زیادتی اور تشدد کا الزام بھی لگا دیا۔ ان کا کہنا ہے کہ طاہر نشہ آور ادویات دے کر واہگہ بارڈر سے پاکستان لایا۔

ان کے مطابق وہ بہت مشکل سے ہائی کمیشن پہنچی ہیں اور یہاں پہنچ کر انہوں نے پناہ لے لی، اب وہ دہلی جانے تک یہیں رہیں گی۔

بعد ازاں ان دونوں کے نکاح کی ویڈیو بھی منظر عام پر آگئی جس میں ڈاکٹر عظمیٰ کو بخوشی اور پورے ہوش و حواس کے ساتھ نکاح کے لیے ہامی بھرتے دیکھا جاسکتا ہے۔

مزید پڑھیں: بھارتی ڈاکٹر عظمیٰ کے نکاح کی ویڈیو سامنے آگئی

دوسری جانب ڈاکٹر عظمیٰ کے شوہر طاہر علی نے مؤقف اختیار کیا کہ عظمیٰ نے اپنی مرضی سے شادی کی اور وہ اب جھوٹ بول رہی ہے۔ طاہر کا کہنا تھا کہ عظمیٰ کو شادی سے قبل ہی معلوم تھا کہ وہ شادی شدہ ہے۔

بعد ازاں یہ اطلاعات بھی سامنے آئی تھیں کہ عظمیٰ خود بھی طلاق یافتہ ہے اور اس کی ایک بچی بھی ہے۔


اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

Print Friendly, PDF & Email

Comments

comments

یہ بھی پڑھیں