The news is by your side.

Advertisement

ویکسی نیشن میں مدد کے بجائے الزام لگا کر پاکستان کو نقصان پہنچایا جارہا ہے: یاسمین راشد

لاہور: صوبہ پنجاب کی وزیر صحت ڈاکٹر یاسمین راشد کا کہنا ہے کہ لوگ ویکسی نیشن میں مدد کے بجائے جھوٹے الزام لگا کر پاکستان کو نقصان پہنچا رہے ہیں، غفلت سامنے آنے پر ذمے داران کے خلاف ایکشن لیا گیا ہے۔

تفصیلات کے مطابق پنجاب کی وزیر صحت ڈاکٹر یاسمین راشد نے اے آر وائی نیوز کے پروگرام باخبر سویرا میں گفتگو کرتے ہوئے کہا کہ ویکسین لگانے کی ذمے داری اسپتال کے سربراہ کی ہوتی ہے۔

سابق وزیر اعظم نواز شریف کی ویکسین کی جعلی انٹری کے معاملے پر صوبائی وزیر کا کہنا تھا کہ غفلت سامنے آنے پر ذمے داران کے خلاف ایکشن لیا گیا ہے اور انہیں معطل کر دیا گیا ہے۔

انہوں نے بتایا کہ اسپتال میں نوید نامی ایک شخص نے ویکسین اندراج کرنے والے کو فون کر کے کہا کہ میرے والد کی انٹری نہیں ہوئی، ویکسین کا اندراج کرنے والے نے کہا کہ نوید کے ان پر کافی احسانات تھے، نوید نے شناختی کارڈ نمبر بتا کر اندراج کروا دیا۔

یاسمین راشد کا کہنا تھا کہ لوگ ویکسی نیشن میں مدد کے بجائے جھوٹے الزام لگا کر پاکستان کو نقصان پہنچا رہے ہیں، میرے لیے یہ بہت تشویش کی بات ہے کہ ایسا کام ہوگیا۔

یاد رہے کہ سابق وزیر اعظم نواز شریف کے شناختی کارڈ پر کووڈ ویکسی نیشن کا جعلی کارڈ جاری کرنے کا انکشاف ہوا تھا جس کے بعد کوٹ خواجہ سعید اسپتال کے ایم ایس اور سینیئر میڈیکل افسر کو معطل کردیا گیا تھا۔

ذرائع کے مطابق نوید نامی شخص نے مقامی اسپتال میں جان پہچان اور ذاتی تعلقات کو استعمال کر کے کرونا ویکسین کا اندراج کروایا اور والد کا نام نواز شریف کے شناختی کارڈ پر درج کروایا۔

Comments

یہ بھی پڑھیں