The news is by your side.

Advertisement

مہنگی ادویات کی فروخت کیخلاف ڈریپ کا میڈیسن مارکیٹ میں چھاپہ، دکان سیل

اسلام آباد : دوا ساز کمپنیوں کی جانب سے جان بچانے والی دواؤں کی قیمتوں میں ازخود اضافے کے خلاف کریک ڈاؤن کرتے ہوئے ڈریپ کے وفاقی وصوبائی حکام نے ملتان کی ہول سیل میڈیسن مارکیٹ میں چھاپہ مار کر دکان کو سیل کردیا۔

تفصیلات کے مطابق جان بچانے والی دواؤں کی قیمتوں میں ازخود اضافے کے خلاف کارروائیوں کا سلسلہ جاری ہے ، عوام کا کہنا ہے کہ قیمتوں میں سو سے دوسو فیصد تک اضافہ کیا گیا ہے۔

اس سلسلے میں ڈرگ ریگولیٹری اتھارٹی آف پاکستان (ڈریپ) کے وفاقی وصوبائی حکام نے مقررہ قیمت سے مہنگی دوائیں بیچنے والوں کیخلاف کریک ڈاؤن کرتے ہوئے ملتان کی ہول سیل میڈیسن مارکیٹ میں چھاپہ مارا۔

ترجمان وزارت صحت ظفرمرزا کا کہنا ہے کہ حکام نے مہنگی دوائیں بیچنے والی لائن فارما ہول سیلر کو سیل کردیا، لائن فارما دوائیں کئی سو گنا مہنگے داموں فروخت کررہی تھی۔

لائن فارما بلڈ پریشرکی دوا170کی بجائے1200میں فروخت کررہی تھی، لائن فارما ایڈالٹ نامی دوا457کے بجائے1900میں فروخت کر رہی تھی،62روپے والی ایسیٹازولومیڈ نامی دوا1350میں فروخت ہورہی تھی۔

ظفرمرزا کے مطابق دوائیں ازخود مہنگی کرنے والےعناصر سے سختی سے نمٹا جائے گا، مہنگی دوائیں بیچنے والوں کو بھاری جرمانے کئےجائیں گے، انہوں نے کہا کہ غیرقانونی و جعلی دوائیں بیچنے والوں سے آہنی ہاتھوں سےنمٹا جائے گا، حکومت جان بچانے والی دواؤں کی دستیابی ہرصورت یقینی بنائے گی۔

واضح رہے کہ گزشتہ کچھ دنوں سے ملک کی میڈیسن مارکیٹ میں قیمتوں میں اضافہ دیکھنے میں آیا ہے، ڈرگ ریگولیٹری اتھارٹی آف پاکستان کی جانب سے اس سلسلے میں غیرقانونی طور پر ادویات کی قیمتوں میں اضافہ کرنے والی 31 دوا ساز کمپنیوں کے خلاف کارروائی کی گئی اور زائد قیمت وصولی پربڑت تعداد میں ادویات قبضے میں لے لی گئی ہیں۔

Comments

comments

یہ بھی پڑھیں