آج کل کی مصروف زندگی میں ہم بیک وقت بہت ساری چیزوں میں الجھ گئے ہیں نتیجتاً ہم ان میں سے آدھی چیزیں بھول جاتے ہیں۔ اگر ہم گھر سے 4 کام کرنے کے لیے نکلیں گے تو 2 راستے میں ہی بھول جائیں گے۔
ماہرین یوں تو چیزوں کو یاد رکھنے کے لیے بہت سے طریقے بتاتے ہیں تاہم ان میں سے ایک مؤثر ترین طریقہ مصوری کرنا ہے۔
ماہرین کے مطابق چیزوں کو یاد رکھنے کے لیے ان کی تصاویر دیکھنے، ذہن میں دہرانے یا گا کر یاد رکھنے سے زیادہ مؤثر طریقہ یہ ہے کہ آپ خود اس چیز کی تصویر بنائیں۔
مزید پڑھیں: سیکھی ہوئی چیزوں کو یاد رکھنے کے طریقے
مثال کے طور پر اگر آپ کوئی ایسا قول یاد رکھنا چاہتے ہیں جو زندگی اور خوشی سے متعلق ہے اور جس میں سفر کا حوالہ دیا گیا ہے، تو اسے یاد رکھنے کے لیے آپ ایک مسکراتا ہوا چہرہ اور ایک ٹرین یا بس بنا سکتے ہیں۔
اس کے لیے آپ کو کوئی اعلیٰ پائے کا مصور ہونے کی بھی ضرورت نہیں، بس سمجھ میں آجانے والی چند لکیریں بھی کافی ہوں گی۔
ماہرین کا کہنا ہے کہ اس طرح تصویر بنانا کسی بھی دوسرے ذریعے کی نسبت یاد رکھنے کا بہترین اور آسان طریقہ ہے۔
