مری اور گلیات کے علاقوں میں برفباری کا سن کر لوگوں کی بڑی تعداد تفریح کی غرض سے ان علاقوں کا رخ کرتی ہے لیکن ڈرائیور حضرات کو کسی بھی پہاڑی سفر سے قبل کچھ اہم باتیں ذہن نشین کرنا ضروری ہے۔
مری کے برف پوش پہاڑوں پر گاڑی چلانا کسی بڑے کارنامے سے کم نہیں اس کیلیے مہارت ہوشیاری گاڑی پر مکمل کنٹرول اور مستعد رہنا بھی ضروری ہے۔
مری میں ساون کے موسم میں پہاڑوں پر زیادہ تر بادل بسیرا کرلیتے ہیں، ایسے میں جب بلند و بالا درخت اور کوہسار خوبصورت بادلوں میں چھپ جاتے ہیں تو ایک طلسماتی منظر نمودار ہوتا ہے۔ اس موسم اور خوشگوار ماحول میں ان شاہراہوں پر گاڑی چلانا ایک خوبصورت اور منفرد تجربہ ہوتا ہے۔
گاڑی چلانے والے کو ایسا محسوس ہوتا ہے کہ جیسے گاڑی سڑک پر نہیں بلکہ فضا میں تیر رہی ہو ایسے میں بعض اوقات گاڑی چلانا خاصا مشکل بھی ہوجاتا ہے، ڈرائیور کی ذرا سی غفلت کسی بڑے حادثے کا پیش خیمہ بن سکتی ہے۔
پہاڑوں میں ڈرائیونگ کے دوران اس بات کو یقینی بنائیں کہ آپ نے نیند پوری اور خوب آرام کر رکھا ہو اور نیند کا غلبہ نہ ہو کیونکہ پہاڑی علاقوں میں ڈرائیونگ کے دوران غلطی کی گنجائش بہت کم ہوتی ہے۔
اس لیے ضروری ہے کہ آپ کی پوری توجہ سامنے سڑک پر ہو پھر اندھے موڑوں پر گاڑیوں کو اوور ٹیک کرنے سے بھی گریز کریں۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں